PATRICK KLUIVERT LO REMPLASÁ GUUS HIDDINK DURANTE E SOBRA PARTIDONAN DI KUALIFIKASHON PA MUNDIAL 2021!

PATRICK KLUIVERT LO REMPLASÁ GUUS HIDDINK DURANTE E SOBRA PARTIDONAN DI KUALIFIKASHON PA MUNDIAL 2021!

Patrick Kluivert lo remplasá e direktor tékniko di nos selekshon nashonal, Guus Hiddink, durante e partidonan di kualifkashon pa Mundial di FIFA ku lo tuma lugá na yüni próksimo.
Guus Hiddink a aserká Patrick Kluivert ku aktualmente tin un kontrakt ku Barcelona te dia promé di yüli 2021, pa fungi komo e direktor tékniko interino di nos selekshon nashonal pa e periodo binidero. E presidente di Barcelona, Joan Laporta ku tin un bon relashon ku Guus Hiddink, a duna su aprobashon pa Kluivert tei durante e próksimo partidonan aki.
Dia 5 di yüni 2021 Kòrsou lo enfrentá British Virgin Islands den eksterior miéntras dia 8 di yüni nos selekshon ta topa Guatemala aki na Kòrsou.

Aktualmente Guus Hiddink ta rekuperando di Covid-19 i lo no ta disponibel pa nos próksimo partidonan. E eskoho pa Kluivert ta debí ku e tin bon konosementu di e manera di práktika futbòl den region i mas ku klaro pasó Kluivert no ta un deskonosí pa nos selekshon. Na aña 2015 te ku 2016 Kluivert tabata e direktor tékniko di nos slekshon i a krea un bon konekshon ku e ekipo i nos isla. Si nos selekshon sali viktorioso di e 2 partidonan aki, nos lo klasifiká pa e di 2 buèlta di e partidonan di kualifikashon ku lo tuma lugá di 12 pa 15 di yüni 2021 kontra e ganadó di grupo D.

Federashon Futbòl Kòrsou ta deseá Guus Hiddink un pronto rekuperashon i ta gradesí Patrick Kluivert pa su disponibilidat pa dirigí nos selekshon nashonal durante e periodo binidero.