“Dia Internashonal di Famia”
Willemstad, 18 mei 2021
“Dia Internashonal di Famia”
Dia 15 di Mei ultimo, mundo a selebra dia Internashonal di Famia. E dia aki, tur aspekto ku ta toka bienestar di famia ta ser pone komo puntonan di enfoke..
Na Korsow, famia ta e nukleo di nos eksistensia. Pesey ta un deber di nos tur pa pone atenshon na tur famia den nos komunidat. Bienestar di famia ta hopi importante pa e ser humano por sobrevivi. Pesey mester fortifika tur famia pa por kuida nan salu, kuida nan yunan i asina kontribui na un komunidat sano.
Un tarea di gobiernu i otro organisashon nan no-gobernamental ta pa traha huntu riba tur area ku ta toka e famia i promove konsiensia riba tur aspekto ku ta kontribui na bienestar di tur famia.
E pandemia di COVID-19 a pone un preshon enorme riba bida diario di hende, kaminda e lockdown a forsa famia pa keda kas, muchanan no por a atende skol i empresanan i ofisinanan mester a sera nan portanan. Tin hasta empresanan ku a sera nan porta permanente kousando desempleo grandi den nos komunidat.
Teknologia a bira e manera dominante pa nos por a sigui komunika ku otro. Muchanan por a kontinua ku nan estudio i hasta kompras mester a sosode online. E mundu virtual a hasi entrada den tur kas i hasi ku e uniko manera pa nos por ta tin kontakto ku otro tabata via teknologia moderno.
Pesey Nashonnan Uni a skohe e tema di e aña aki riba Dia Internashonal di Famia 2021:
“Famia i Teknologia”.
E temporada prolonga di COVID-19 a hasi teknologia digital hopi importante pa trabou, edukashon i komunikashon. E pandemia a aselera e kambionan teknologiko ku tabata den desaroyo kaba, i a bini un Plataforma digital ku tur famia den nos komunidat mester a adapta na dje. Trabou a bira virtual i kontakto entre e hende a bira limita.
Nos no mester lubida tampoko e impakto di esaki riba por ehempel ensenansa, kaminda klasnan a bira virtual i a remplasa e interakshon entre maestro i alumno. Mayornan mester a adapta na e situashon, kaminda nan yunan tabata na kas i nan rol komo mayor den ensejansa di nan yu a bira aun mas grandi.
Mirando tur e desaroyo nan aki, lo ta importante pa nos hasi un analisis riba e impakto ku teknologia tabata tin riba e famia, inkluso asesibilidat, privasidat, seguridat.salu fisiko i mental, pa nos por sigui prepara kon ta atendé ku impakto negativo riba e famia.
“Families are like branches of a tree. We grow differently but our roots remains the same”.
Ruthmilda Larmonie
Lider di Partido Nashonal di Pueblo
