Dia 14 di yüni ta Dia Mundial di Donante di Sanger

Dia 14 di yüni ta Dia Mundial di Donante di Sanger

Willemstad – Tur aña di nobo, dia 14 di yüni paisnan rònt mundu ta selebrá Dia Mundial di Donante di Sanger. Esaki ku e meta pa konsientisá komunidatnan riba e importansha pa duna sanger i enkurashá mas tantu hende posibel pa bira donante di sanger. E aña aki tambe ta yama danki na tur e voluntarionan ku sin pago pa nan gesto ta duna sanger pa salba bida di otro. Importante ta pa konsientisá tokante e nesesidat ku ta eksistí pa duna sanger i e garantia di kalidat, seguridat i disponibilidat di e produkto sanger pa pashèntnan ku ta den nesesidat.

Transfushon di sanger i produktonan di sanger ta yuda salba miónes di bida tur aña. E por yuda pashèntnan ku ta sufriendo di kondishonnan ku lo a kosta nan bida i sostené proseduranan di sirugia. Tambe e tin ròl esensial den skapa bida di hende momentu di  un desaster òf aksidente. Awendia, ta na apénas 62 pais e kantidat di sanger ku ta keda produsí pa nan propio hendenan ta yega 100% di dunadónan di sanger ku ta hasi esaki di un forma voluntario, miéntras ku den 40 pais ainda esaki ta dependé di famia òf hasta di hendenan ku mester wòrdu pagá pa nan duna sanger.

Kòrsou ta un di e 62 paisnan ku e sanger ku ta keda produsí ta yega pa e demanda lokal. Banko di Sanger ta konta ku mas ku 3000 dunadó di sanger kual ta alrededor di 3.2% di adultonan aki na Kòrsou. Tur e mas ku 3000 donantenan di sanger aki ta sòru pa alrededor di 6000 donashon pa aña kual ta representá 2700 Liter di sanger pa aña. Banko di Sanger ta sòru tambe pa produktonan di sanger pa Kòrsou mes, pero tambe pa Boneiru i Sint Maarten. Apesar di por kumpli ku e demanda lokal, Banko di Sanger lo kier risibí mas dunadó di sanger pa asina por keda kumpli ku e demanda kresiente.