Adaptashon di sitanan pa bai traha sédula

 

Adaptashon di sitanan pa bai traha sédula

Geplaatst op 14 July 2021 dor di Ministerio Maneho di Gobernashon, Planifikashon i Servisio Públiko

WILLEMSTAD –  Den kuadro di preparashon pa kuminsá entregá sédulanan nobo, Departamento di Asuntunan Públiko (Kranshi) di Ministerio di Maneho di Gobernashon, Planifikashon i Servisio Públiko ta informá lo siguiente. Sitanan pa kambia sédula durante e siman di 19 di yüli 2021 lo tin adaptashon.

Tur kliente di Kranshi ku tin sita den e siman di 19 pa 23 di yüli benidero, ta haña un yamada pa kambia nan sita pa un otro fecha. Teniendo na kuenta ku ta bai introdusí e sédula nobo di Kòrsou mester a hasi algun adaptashon. Relashoná ku preparashonnan adishonal e orario di e sitanan pa e siman ariba menshoná ta kambia. E kambio ta sosodé na momento ku Kranshi mes yama i duna e kliente un sita nobo.

Tur persona ku tin nan sédula ku ta bálido te na e momento akí no mester hasi ningun kambio. E ta keda bálido te na momentu ku e kaduká. Kranshi ta konta ku e komprenshon i kooperashon di su klientenan. Departamento di Asuntunan Públiko ta keda hasi su máksimo esfuerso pa sirbi nos komunidat mas mihó ku e por.