Situashon Sosial
Situashon Sosial
Kralendijk, 21 yüli 2021
Pa añanan hopi esfuerso ta ser hasí pa stipulá un eksistensia mínimo pa Boneiru, basá riba un kantidat di rapòrt di investigashonnan sientífiko ku a hasi riba e situashon di pobresa riba nos isla. Mi por menshoná aki rapòrt Nibud, Regioplan, pero tambe rapòrtnan skirbí pa Ombudsman, Kolegio di derechonan humano i últimamente un rapòrt trahá pa Banko Mundial. Tur ta yega na e mesun konklushon, esta ku e entrada di nos hendenan ku ta risibí ònderstant i penshun di behes no ta alkansá pa kubri e gastunan básiko di tur luna ku ta entre otro paga hür di kas, paga awa, koriente, internèt i telefòn, transporte públiko, gastunan pa yu (kinderbijslag) i kuminda. Den Diálogo Sentral, partidonan -esta gobièrnu, organisashon di dunadónan di trabou i organisashonnan di e klase trahadó- a yega na un akuerdo pa subi suèldu mínimo i kuné subi e “uitkeringen” manera ònderstant, penshun di behes i “kinderbijslag” na un nivel mas desente.
Den Tweede Kamer na Hulanda despues di e debate último 16 di yüni, diferente moshon a keda presentá pa gobièrnu Hulandes stipulá e eksistensia mínimo di akuerdo ku e realidat di nos komunidat. Tur esaki den kuadro di kombatí pobresa ku ta un di e metanan tambe ku Nashonnan Uni ta preskribí. Un punto importante pa menshoná aki ta, ku miéntras ku na un banda ta oumentá e entrada, gobièrnunan mester pèrkurá pa gastunan no sigui subi, sino ta kargamentu di awa hiba laman antó pa kolmo den un makutu di kabana. Parlamento ta bai ku fakansi, Konseho Insular ta bai ku fakansi, pero bida di tur hende ta sigui normal i e situashon aki mester di atenshon.
Entre tantu apesar di tur e esfuersonan aki, nos por tuma nota ku tur produkto na pòmpnan di gasolin a subi, inkluso gas pa kushiná, i a anunsiá ku ta bai subi hür di kasnan di fundashon i awor a anunsiá ku a subi koriente basta pisá. I komo sifuera no ta basta, ya a anunsiá ku e supsidio ku Hulanda tabata duna WEB lo no t’ei mas na yanüari 2022 ku e konsekuensia ku na yanüari 2022 koriente probablemente lo sigui subi. Tambe lo stòp ku e supsidio ku gobièrnu Hulandes tabata duna tur usuario pa ku “vastrecht” di koriente i awa i tambe e US$25 pa internèt.
Mundialmente ya tin anunsio ku ta bai subi transporte di merkansianan ku nos tin ku importá di afó. Tur esakinan manera tur hende por komprondé lo bai nifiká ku preis di produkto i servisionan aki na Boneiru lo bai subi, pues nos gastunan mensual lo oumentá. Esaki lo nifiká otro sla duru pa tantu esnan vulnerabel den nos komunidat, komo esnan ku ta traha, pero ku nan suèldu ta na nivel di suèldu mínimo. En bes di mengua e pobresa esaki lo bai oumentá sin ku te ainda tin un vishon kon ta bai kompensá e subidanan di kosto di bida aki. Na Hulanda nos tin un gabinete demishonario ku ta bisa ku nan no mag ni por tuma ningun desishon, miéntras ku no tin un bista ki dia lo forma un gobièrnu nobo na Hulanda ku tur su konsekuensianan pa ku nos aki na Boneiru. E situashon ta realmente frustrante i sin perspektiva.
Mi ta hopi preokupá pa e situashon ku ta pinta nos dilanti i mi ta di opinion ku gobièrnu di Boneiru mester por presentá un plan kon ta bai atendé ku e gruponan vulnerabel den nos komunidat pa nan por wanta e gòlpi ku ta na kaminda. Un akshon ku nos a komprondé ta, ku gobièrnu pa loke ta luna di yüli, lo bai apsorbá e oumento di preis di koriente. Pa ken esaki lo ta aplikabel no ta konosí ni tampoko kiko lo bai pasa ku e otro lunanan. Mi opinion ta ku si gobièrnu ta bai apsorbá e oumento, hasi esaki pa e gruponan vulnerabel i no pa esnan ku por karga e oumento aki nan mes.
Pa mantené e preis di koriente na un nivel pagabel mester pensa tambe kon ta bai pone mas preshon riba i konvensé gobièrnu Hulandes pa nan sigui karga nan responsabilidat di supsidiá WEB te ora WEB realisá produkshon di energia alternativo ku lo ta muchu mas barata ku aktualmente ta e kaso, Na Hulanda e tipo di oumentonan aki ta ser kargá pa miónes di hende, ta imposibel pa spera ku un komunidat chikí manera Boneiru (21 mil hende) por karga tur e oumentonan aki su so. Pa e islanan di Waddeneilanden tambe Hulanda tin un provishon pa kompensá e oumentonan aki.
Boneiru a bira parti di Hulanda i komo tal no mester tin diskushon kiko ta un nivel di bida akseptabel den Hulanda. Por hasi diferensiashon pero esaki semper mester ta na benefisio di Boneiru. Pa tal rason mi ta bolbe ripití loke mi a splika Eerste Kamer. Ta un echo ku e espektativanan ku a krea pa a sostené Laso Direkto na 10-10-10 no ta e realidat ku nos ta bibando aden 11 aña despues. Tin muchu indikashon ku en bes di promové un desaroyo sano, tin puntonan ku netamente ta stroba e desaroyo sano di nos isla. A yega e momentu pa nos sinta huntu i riba nivel polítiko analisá e kontenido di e relashon ku nos ta aden aktualmente for di 10-10-10 ku Hulanda.
Désirée Coffie
Miembro di Konseho Insular.
