246 STUDIANTE TA RISIBÍ NAN SERTIFIKADO DESPUES DI A SIGUI KURSONAN DI INSTITUTE FOR PROFFESIONAL EXCELLENCE
246 STUDIANTE TA RISIBÍ NAN SERTIFIKADO DESPUES DI A SIGUI KURSONAN DI INSTITUTE FOR PROFFESIONAL EXCELLENCE
Willemstad 5 di Ougùstùs 2021 – No menos ku 246 studiante den profeshon di IT, kostura i produkshon di paña i peska i merkadera, ku a sigui kursonan organisá dor di Institute for Professional Excellence (IPE) a risibí nan sertifikado despues ku nan a konkluí nan kurso ku éksito. Esaki a tuma lugá durante di un seremonia, ku a konta ku presensha i diskurso motivadó di Minister Presidènt Sr. Gilmar Pisas, Minister enkargá ku tantu Desaroyo Ekonómiko komo Desaroyo Sosial, Labor i Bienestar, Sra. Ruthmilda Larmonie-Cecilia i tambe Minister enkargá ku Salubridat, Naturalesa i Medio Ambiente, Dr. Dorothy Pietersz-Janga. Pastor Curtis Meris tambe a trese un mensahe inspirativo pa e kursistanan durante e seremonia. E liña korá ku a resoná den e diferente mensahenan durante e seremonia tabata ku e formashon risibí ta krea e base pa esnan ku a konkluí e kursonan serka IPE, pa nan sigui pa dilanti, no opstante retonan, i logra éksito den bida.
Un total di 150 studiante a komplementa nan estudio di IT ku speshalisashon den e areanan di Developer, Data Analyst/BI, System Administrator, Cyber Security òf Cloud Specialist. Awor ku e graduadonan a kaba nan estudio nan ta prepará pa pasa un eksamen ku ta duna nan rekonosementu internashonal. Esaki ta e promé trayekto di formashon di IPE, kaminda e partisipantenan direktamente por haña trabou tantu na Kòrsou komo den eksterior. 54 kursista a kaba e formashon di konosementu básiko di produkshon di paña i moda i e industria di fabrikashon. E kursistanan aki a risibí tambe un formashon den koperativismo. Por último un grupo di 42 kursista a risibí nan sertifikado despues ku nan a kompletá e kurso di piskadó i merkadera.
IPE ta kontentu ku di por a kontribuí di e forma aki na kapasitashon di mas yu di tera den trabounan ku ta sirbi komunidat, no únikamente awe, pero ku mira pa proveé tambe pa e djopnan ku den futuro ta importante. Un danki ta bai na PURE ICT, D’Loran i Federashon Kooperativanan Uní di Produkshon pa e kolaborashon, pa asina por a hasi e kursonan aki posibel.