PIN: parse ku ta burt pa kòrta den kuido! Gobièrnu Pisas ta pasa kuchu den kuido ignorando prevenshon totalmente.

 

PIN: parse ku ta burt pa kòrta den kuido!

Gobièrnu Pisas ta pasa kuchu den kuido ignorando prevenshon totalmente.

 

Willemstad — Asombrá Partido PIN a tuma nota ku Gobièrnu Pisas lo baha nivel di kuido. Den e medidanan akordá pa Konseho di Minister dia 30 di yüli último, na lugá di wak unda tin ekseso di uzo òf ganashi den e kandena di salubridat, riba komando di sr. Knops, gobièrnu Pisas a disidí di kòrta direktamente den e kalidat i kantidat di kuido ku komunidat por disponé di dje. Loke ta hasi e asuntu mas grave ta ku e lista largu di medida ningun kaminda no ta menshoná prevenshon. Esaki ta bin riba e hecho ku e gobièrnu aktual ta atendiendo ku COVID na un manera lalilali, peligrando kuido di hospital. 

 

Remarkabel

Minister Silvania a habri afó kontra ekspertonan su idea pa gradualmente eliminá e bono di pasku pa kobradónan di AOV. Sinembargo ta parse ku sr. Silvania i sobra ministernan ta di akuerdo ku e sobrá konsehonan dje mes ekspertonan ei. Konsehonan ku kada un riba nan mes ta kòrta drastikamente den e kantidat i kalidat di kuido ku Ma Yeye mester di dje. 

Sin ningun debate públiko òf interkambio ku parlamentu, gobièrnu Pisas ta kòrta di forma indeskriminá un èkstra 10 % (ke men e rekorte ta bira total 20%) den AOV di esnan ku ta biba afó i asina ta ignorá e sentensia di Korte di Hustisia di 1 di mart 2021. Tambe a disidí entre otro ku lo stòp di paga pa transplante di kurason, pulmon i higra. Tur esaki siendo ku ta bon konosí ku nos pais tin un dje sifranan mas haltu di malesa ku ta afektá kurason, pulmon i higra.

Tambe lo redusí ayudo ku fisioterapia i artikulonan ortopédiko i mea di sosten. Tur esaki siendo ku gobièrnu sa bon bon ku, kousá pe sobrepeso haltu den nos pais kombiná ku embehesimentu, e nesesidat di e tipo di yudansa aki ta birando mas grandi dia pa dia. Si pone e medidanan aki huntu ku e manera erátiko ku ta atendiendo COVID, Partido PIN ta haña e impreshon ku gobièrnu Pisas ke laga esnan mas debil pa nan kuenta. 

PIN lo por tabatin komprenshon si e gobièrnu aki lo a kompañá su medidanan ku un programa di prevenshon agresivo manera eks minister Camelia-Römer a inisiá. Sinembargo ta parse ku e komando di sr. Knops i minister di Finansas sr. Silvania ta e uniko kompas ku gobièrnu Pisas konosé.

Kosmétika

Ta di lamentá ku gobièrnu Pisas ta hunga un wega di kosmétika inefektivo kargando empresanan ku tur gastu di 3 dia adishonal di ríesgo propio pe trahado den kaso di malesa. Meskos ta konta tambe ku movementu di e gastunan di tèstnan sikológiko estudiantil pe ministerio di edukashon.

 

Burt pa hacha

Al final, banda di tur e efektonan negativo riba kuido i aktividat ekonómiko, pa PIN ta inkomprendibel ku mientras parlamentu i gobièrnu a diskutí te den oranan di marduga grandi riba redukshon solamente temporal di nan salario, awe trankilamente e mes gobièrnu Pisas ta planeá pa redusí salario di e trahadónan den kuido permanentemente ku 12,5%.

 

Ora PIN tabatin e responsabilidat pa GMN, su minister Camelia-Römer a skohé pa tuma medida riba e skoudernan mas hanchu. Esei ta un plan B! No medidanan ku ta kibra lomba di pueblo i trahadó. Den e kaso aki e esküs ku ta Hulanda ta imponé no ta konta pasó ta esnan den gobièrnu aktual a insistí ku lo pone landenpakket i COHO un banda.  Ta parse ku ‘burt pa pueblo’ a bira ‘burt pa hacha’.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: