Polis tin atenshon pa atrakonan riba grandinan den banda’riba.

KOMUNIKADO DI PRENSA 299 / 2021
27 ougùstùs 2021
Polis tin atenshon pa atrakonan riba grandinan den banda’riba.
Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ
Kuerpo Polisial ta kompartí e preokupashon di habitantenan di banda’riba, ku último
simannan ta keda asotá pa kasonan di ladronisia i tambe atrakonan den áreanan di entre
otro Montaña, St. Joris, Langule, Katoentuin, Rooi Santoe i Caracasbaaiweg.
E atrakonan aki ta tumando lugá prinsipalmente riba hendenan di edat ku sea nan so ta
biba of na momentu ku nan so ta na kas.
Durante di diferente seshon organisá ku habitantenan di barionan di p’ariba, polis a papia
ku siudadanonan preokupá i ta yudando nan organisá nan mes, pa na un manera mas
deligente nan por yuda vigilá i suministrá polis ku informashonnan balioso pa pone man
riba e anti-sosialnan aki.
Aparte di rekomendashonnan di kon pa prevení, a lanta diferente app group i aktivá
‘neighbourhood watch’, pa asina polis por mobilisá mas lihé i aktua asta promé ku e atrako
tuma lugá.
Di parti di polis tambe a tuma algun medida pasobra ta huntu nos mester kombatí krímen
riba nos isla.
Naturalmente pa ta eksitoso den nos operashon, nos no por divulgá nos strategía i plan di
atendementu integral.
Sí nos por bisa ku a oumentá e kantidat di unidatnan di polis den oranan di mardugá den e
parti p’ariba di Kòrsou, ku tantu personal den uniform den outo di polis ku bo ta rekonosé,
pero tambe personal na sivil den outonan ku no ta keda rekonosé komo outo di polis.
Den próksimo dianan polis lo keda den kontakto direkto ku organisashonnan di barionan di
banda’riba, pa asina interkambiá di informashon.
Bou di e malechornan ku ta kometé e atrakonan aki, tin hóbennan di edatnan
relativamente abou i e pregunta kardinal ta keda, kon asta awor ku toke de keda ta na
vigor, e hóbennan aki ta riba kaya okupando nan mes ku aktividatnan kriminal, sin ku
mayornan sa?
Ta bon pa informá ku e Tim di Atrako ta trahando inkansablemente riba e kasonan aki
tambe i ya ta siguiendo moveshon di algun sospechoso.
Nos ta keda hasi un apelashon riba komunidat pa na momentu ku bo tuma nota di
personanan of vehíkulonan sospechoso den bo alrededor, pa opservá e persona i/o
vehíkulo bon i pasa tur e detayenan aki pa polis mesora.
Den kaso di urgensia yama 911 i pa kasonan ku no ta urgente, por yama e number 917.
Si bo tin informashon i ta desea na keda anonimo, por yama e lina 108.
Bou di tur sirkumstansia, laga nos keda kabes friu i no tuma lei den nos propio man.
Kuerpo Polisial ta sigui konta ku bo koperashon pa nos hasi e área di p’ariba bèk un area
sigur i seif, kaminda siudadanonan ta biba den tur trankilidat.
Danki pa konfia bo Kuerpo Polisial i sigui kana ku nos.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: