Diskurso dia di Boneiru 6 sèptèmber 2021

 

Diskurso dia di Boneiru 6 sèptèmber 2021

 

Bida di kada un di nos ta un trayekto konstante  di deskubrimentu i toma di desishon. Kada dia di nobo ta habri un página blanku ku ningun di nos no sa kon e dia lo transkurí. Awe, riba dia di Boneiru mi kier enfatisá riba bida i tambe riba prinsipionan ku ta determiná kalidat di bida. Mi promé konseho ta pa nos biba ku pashon, no laga ningun persona òf instansia deshasí di bo metanan i trata na kita bo felisidat. Ta kada un di nos ta para òf sinta tras di e stürwil di nos propio bida. 

For di e promé sekònde ku un ser humano mira lus di bida un lus a sende. Ta na mayornan primeramente i despues famia, bario, maestronan, lidernan i al final nos mes pa pèrkurá pa e lus sigui bria i keda sendé-sendé. 

 

Mayornan tin un ròl hopi importante pa eduká, forma i krea siudadanonan ehemplar i sòru pa e lus den kada hóben floresé. 

Famia ta e núkleo mas importante den kualkier sosiedat. 

Bario tin e tarea pa yuda eduká i krea un ambiente sano kaminda e hóben por desaroyá su talentonan optimalmente. 

Skol i edukadornan ta indispensabel den desaroyo di nos futuro prospektonan i mester realisá ku mester sigui fortifiká edukashon di kas i saka lo máksimo for di kada kriatura. 

Lidernan mester ta ehemplar i hasi nan máksimo esfuerso pa kada gremio, sektor i grupo den komunidat haña e atenshon nesesario. 

Grandinan sa uza e proverbio ” vruminga bou di saku di suku no ta muri”. E proverbio aki ta bisa hopi i por ser interpretá den diferente forma.

 

  • Mayornan ku duna nan yunan amor, atenshon, bon edukashon ta ser konsiderá dor di nan propio yunan despues komo Rei i Reina.
  • Famianan ku ta sostené otro i korigí otro ta fomentá felisidat i krea un pueblo ku prinsipionan haltu.
  • Barionan limpi, bunita i bon organisá ta laga nos isla lusi.
  • Maestronan di skol ku amor i dedikashon pa nan profeshon lo ser apresiá i respetá dor di komunidat pa semper.
  • Lidernan berdadero lo ser konsiderá héroe ora esnan ménos privilegiá den komunidat ta disfrutá di un bida konfortabel.

 

Boneiru, mi isla stima, tin hopi pa ofresé na su pueblo i bishitantenan. E baranka aki tin un kultura i historia riku kaminda ta reina trankilidat, pas i hermandat. Esaki nan mester fungi komo e fundeshi pa futuro desaroyo. 

 

Lamentablemente awe mester a eliminá e parti festivo/ kultural pa motibu di COVID i nos kier kòrda un i tur pa sigui protehá bo mes kontra e enemigu invisibel ku yama COVID-19.

 

Banda di COVID tambe nos tin algun otro reto nos dilanti ku tur pais den desaroyo ta pasa aden i awe mi kier menshoná algun:

 

  • Nos mester kambia di un mentalidat di dependensia pa un mentalidat di responsabilidat propio. Si esaki enbèrdat tuma lugá nos lo haña libertat mental ku na su turno lo hasi nos hopi mas kreativo i produktivo.
  • Nos  mester stòp di gasta tempu i energia na kosnan ku nos no por kambia òf influensia i dediká tur nos potensial i rekursonan na progreso i adelanto. Esaki pa e simpel echo ku nos rekursonan humano ta limitá. Ta ku trabou inkansabel di un i tur i un vishon bon deliniá  por logra metanan muchu mas aya. 
  • Reklamo sin base no ta kita e preokupashon di awe i lo krea estorbo den nos pensamentu pa yega na un solushon kreativo pa nos retonan.
  • Tin ora nos tin demasiado ambishon ku ta trese intrankilidat polítiko i sosial. Semper lo bai tin serunan haltu ku nos NO por subi i mester reserva energia, fondo i kapasidat pa yega mas leu ku ta posibel.

 

Pa surpasá e desafionan ku mi a kaba di menshoná mester uni forsa, buta e ser humano sentral i kombatí nos enemigu mas grandi, ku ta miedu.  Na hopi okashon mi ta tende ku nos mes no por. E aspekto di debilidat aki definitivamente mester pasa pa olvido.

 

Grandi  ta, i respetá nos lo bira ora nos kultu

ra di trabou den gobièrnu i sektor priva, pero tambe den famia mester ta basa riba prinsipionan di rèspèt,       komprenshon i aseptashon      i apresio pa bo mes, bo alrededor i otronan. 

Kada desaroyo maske kon chikí e por ta mester tin un karakter duradero, apesar ku nos rekursonan finansiero i humano ta limitá. No mag di tin desperdisio di tempu, ni plaka.  Laga ora nos ta defendé interes di nos patria, laga nos hasi esaki kolektivamente i ku hopi orguyo. Awe riba e dia tan speshal aki mi kier hasi un petishon na henter pueblo pa den futuro riba dia di Boneiru pa e bandera di Boneiru ta waya na kada kas i edifisio.

 

Komo isla chikitu semper bai nos mester keda ALERTA. Eksperensia di bida a siña nos ku no ta tur palabra ta kos di papia i no ta tur pregunta tin kontesta.

Pero bida a siña nos tambe ku huntu nos ta yega mas leu i ku apoyo i sosten di un i tur nos ta logra metanan mas aya.

 

Un felis dia di Boneiru i laga nos sigui disfrutá di bida i hiba Boneiru kada dia mas dilanti. Kòrda ku sali na vanguardia di nos isla ta un responsabilidat di nos tur. BIBA NOS BONEIRU.

 


 

Awe mainta mi ke yama tur hende bon bini. I na nos bishitantenan un kaluroso Bon bini na nos isla Bendishoná.

 

Mi ta bisa Bendishoná paso mi ta konvensí ku un pueblo ku ta kanta den su himno ku su speransa ta den Dios tin un lugá spesial den nos Kreador su kurason.

 

Esaki no ta kita ku nos tabatin i lo tin nos retonan pa superá.

 

Apesar ku ami, kisas meskos ku boso, ta kansa di Covid-19 mi lo tin ku toka e tema aki. No pa mustra bosnan riba e reglanan di higiena pero mas bien pa para ketu na un efekto adishonal ku e tin riba nos pueblo. Covid a aselerá un proseso di divishon ku lástimamente a drenta den nos isla i a kita nos enfoke. Sinta tras di un ‘skrin’ di telefòn òf kòmpiuter nos ta ataka, husga i kibra otro. Invenshonnan ku a wòrdu krea pa uni nos i tene nos den kontakto ku otro a para bira armanan mortal ku pa kolmo ta tene nos prezu.

 

Divishon ta funesto pa Adelanto di nos pueblo. Divishon ta kita nos enfoke fo’i riba nos meta. Nos meta komun mester ta un boneiru kaminda pas I trankilidat ta reina den harmonia ku naturalesa, kompaña pa prosperidat pa nos kada un. Si pa nos kada un! 

 

Pa logra esaki nos mester di ta uni, nos mester ta den unidat òf den union

 

Unidat òf union ta nifiká ku apesar ku nos ta distinto, nos ta bai den e mesun direkshon pa logra un meta òf propósito komun.  Mira komo ehèmpel nos tim di futbòl di U 14 ku a Sali kampion siman pasa. E tim ta konsistí di diferente hóben ku diferente tarea, sea delantero, defensa, bolante of kiper (fanátikonan di futbòl despensa si ma lubidá unu). E hóbennan aki apesar di nan diferensia tur tabata move den e mesun direkshon pa logra un meta komun, esta hinka gol I gana!

Òf pa mi tene konforme e tópiko di e dianan ku a pasa: Músikonan den un orkesta. Ora bo tende kada un apart e por zona inkomprendibel i no balansá,pero ora e momentu riba esenario yega I e dirigente duna señal, nan ta toka huntu I trese un piesa harmonioso dilanti ku ta karisia bo oido.

 

Meskos ku un tim tin su kapitan, un orkesta tin su dirigente nos pueblo, barionan, iglesianan, sindikatonan, organisashonnan i famianan mester di lidernan ku ta keda dirigí tur hende den direkshon di e meta komun. 

Mi ta hasi un apelashon riba henter pueblo I espesialmente riba tur lider pa lanta, dobla manga di kamisa I yuda primeramente pa trese e union bek den tur área di nos komunidat pa asina nos tur bai den e mesun direkshon. E direkshon pa logra yega nos meta komun. Esta: un Boneiru manera e la wòrdu krea pa e ta: un isla kaminda pas I trankilidat ta reina den harmonia ku naturalesa ku prosperidat pa nos kada un. Kaminda tin rèspèt pa otro I kaminda por tin kritiká konstruktivo pa realisá nos meta komun. 

 

Terminando mi ke deseá tur hende ku su kurason ta bati pa Boneiru un Felis dia di Boneiru I ku Dios sigui Bendishoná nos isla!

 

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: