NEW SONG TA TITULÁ KAMPION DI KAMPIONATO HUBENIL 2020-2021 KATEGORIA U-17!
NEW SONG TA TITULÁ KAMPION DI KAMPIONATO HUBENIL 2020-2021
KATEGORIA U-17!
Djasabra último, kategoria U-17 di Kampionato Hubenil 2020-2021 a yega na su final ora ku New Song a titulá kampion despues di a gana Vesta ku skor di 5-4 na tirunan penal. Durante e tempu reglamentario e partido a finalisá ku un empate di 1 gol, pa seguidamente pasa pa tirunan penal ku a hiba New Song na e viktoria ku e título di kampion di Kampionato Hubenil kategoria U-17. E partido aki a tuma lugá den Stadion Ergilio Hato pa mitar di 7 di anochi, sin presensia di públiko debí na medidanan di Gobièrnu en konekshon di Covid-19. Un grupo selektá di persona ligá na ámbos tim a haña e oportunidat di presensiá un tremendo partido, bon bringá pa tur 2 ekipo.
Tiki tiki pero sigur nos Kampionato Hubenil ta yegando na su gran final mirando ku kategoria U-9 te ku U-17 ya tin nan ekiponan kampion i supkampion.
Úniko kategoria ku ainda mester yega na su final ta kategoria U-20 ku debí na Covid-19 i e medidanan implementá pa Gobièrnu di Kòrsou a dura poko mas largu ku Komishon Hubenil a premirá.
Komishon por mira bèk riba un aña poko turbulento debí na Covid pero tòg eksitoso mirando ku e kampionato aki lo yega na su final pronto.
FFK i Komishon Hubenil ta felisitá e ekipo di New Song i ekipo di Vesta ku a duna un bon bataya durante e partido final aki. Danki na tur mayor, entrenadó, dirigente i tur ku di un manera òf otro a kontribuí pa un Kampionato Hubenil eksitoso!
Masha pabien i sigui ku e bon trabou!
20 sèptèmber 2021
