Philip (Fifi) Rademaker ganador “Premio Cola Debrot 2021”

Philip (Fifi) Rademaker ganador “Premio Cola Debrot 2021”

Geplaatst op 21 September 2021 dor di Ministerio Enseñansa, Siensia, Kultura & Deporte

WILLEMSTAD – E premio Cola Debrot pa 2021 ta keda otorgá na sr. Philip (Fifi) Rademaker pa su esfuersonan grandi brindá riba tereno di literatura. “Premio Cola Debrot” ta un premio riba tereno kultural ku for di 1968 ta keda otorgá na un persona òf organisashon ku a hasi trabounan meritorio riba tereno di arte. E diferente kategorianan di arte ku ta keda premiá ta: arkitektura, arte visual, baile, folklor, literatura, músika, teater òf siensia. E aña akí a toka turno na e kategoria di “Literatura”.

Gobièrnu di Kòrsou ta felisitá sr. Philip (Fifi) Rademaker pa kere den Kòrsou, den positivismo i un konstrukshon sano di nos pais. Su kontribushon ta stimulá i guia un gran parti di nos komunidat pa amplia i elevá nan konosementu pa medio di literatura.

E proposishon pa otorgá Premio Cola Debrot ta keda hasí pa Konseho Kultural Kòrsou ku tur aña di nobo ta instituí un komishon independiente pa skohe ganador di e prestigioso premio.  E aña akí entrega di e premio no a logra tuma lugá riba 4 di mei (fecha natal di Cola Debrot) pa motibu di sirkunstanshanan di COVID-19 i “lockdown”. Premio Cola Debrot ta konsistí di un boton di oro representando e flor di laraha, un sertifikado i un suma.

Gobièrnu ta yama danki na Konseho Kultural Kòrsou pa un tremendo trabou i ta informá ku entrega di e premio ta tuma lugá 1 di òktober 2021.