VEREDIKTO DI KORTE SUPERIOR NA FABOR DI REFINERIA DI KÒRSOU TA SALBAGAURDIÁ INTERES DI KÒRSOU
VEREDIKTO DI KORTE SUPERIOR NA FABOR DI REFINERIA DI KÒRSOU TA SALBAGAURDIÁ INTERES DI KÒRSOU
Willemstad 26 di Sèptèmber 2021 – Resientemente Korte Superior na Ulanda e dikta un sentensha kaminda atrobe Refineria di Kòrsou (RdK) a gana un kaso kontra PDVSA. Korte na Den Haag a dikta ku e ta duna RdK rason i a rechasá e petishon di PDVSA pa prohibí RdK pa ehekutá desishon di korte na Kòrsou. Esei ta nifiká ku RdK por sigui ku e proseso di ehekutá e beslag ku e tin riba e akshonnan di e kompania Propernyn na Ulanda, ku ta un kompania yu di PDVSA. Benta di e akshonnan di Propernyn mester kompensá debenan ku PDVSA tin na RdK i Kòrsou pa hür di e instalashon petrolero na luna di Novèmber i Desèmber di 2019, plus take-or-pay fee pa pago di utilidat di CRU ku PDVSA no a paga na RdK. Ta trata di un debe total di 52 mion dòler. Ku e kaso aki RdK a salbaguardiá interes di Kòrsou i a perkurá ku loke ta pertensé na pueblo di Kòrsou ta keda kumplí kuné.
Na final di e kontrakt di maneho i operashon di e fasilidatnan petrolero di Kòrsou dor di PDVSA na fin di 2019 a surgi un disputa pa pago di gastunan ku PDVSA no a kumpli kuné. E perspektiva tabata ku e kompania lo no a paga esakinan tampoko, mirando e gran kantidat di debitornan ku nan tin. Na Mart di 2020 korte na Kòrsou a dikta ku PDVSA mester paga e gastunan na RdK pa e hür atrasá i tambe take-or-pay fee pa uso di utilidat konforme e kontrato entre e dos partidonan. PDVSA na su turno a pidi Korte di Arbitrahe pa prohibí RdK di ehekutá e desishon di korte. Esaki a keda konsedé na PDVSA e tempu ei. E desishon resien ta di e Korte di Arbitrahe ku a konkluí ku RdK por pone beslag i bende e propiedat di Propernyn, debí ku desishon di un Korte na Kòrsou ta bálido den Reino.
RdK próksimamente lo pasa pa destaho di e propiedat di Propernyn bou di kua tambe ta pertenesé e fasilidat di trasbordo na Boneiru, konosí komo BOPEC. Ku e akshon aki RdK a haña rason den su empeño pa salbaguardiá interes di Kòrsou i supsekuentemente RdK. Rekursonan rekobrá for di e akshon aki lo keda usá pa garantisá futuro operashon di e fasilidatnan petrolero na Kòrsou i demas propiedatnan di RdK ku por sirbi komo fuente pa desaroyo i bienestar di nos komunidat.