Partido Democraat: Pa yega na un mehorashon rápido i drástiko di nos sistema di salubridat, koperashon mas estrecho i stratégiko denter di reino ta urgente.  

 

Partido Democraat: Pa yega na un mehorashon rápido i drástiko di nos sistema di salubridat, koperashon mas estrecho i stratégiko denter di reino ta urgente.  

 

Resientemente durante un reuda di prensa yamá pa CMC, e gerensia a indiká ku CMC no ta tuma ningun asegurado di SVB pa e próksimo tres lunanan a lo menos si ta trata di un operashon urgente. Nos poblashon un biaha mas ta sali perhudiká!

 

Segun Partido Democraat, pa yega na un mehorashon rápido i drástiko di salubridat i drecha e stiuashon na CMC, koperashon mas estrecho i stratégiko denter di konstelashon di reino ta urgente i eminente i mester traha pa yega na esaki rápidamente. Esaki pa garantia di un maneho inklusivo pa garantisá un kuido pagabel,  aksesibel i sostenibel pa tur siudadano. E siudadano semper mester sali benefisiá. 

 

Tambe lo mester promové koperashon entre instansianan lokal i partnernan den reino hulandes, konsiderando e eskala chikitu di nos isla (nan). 

 

Segun Democraat, un par di punto ta krusial:

Mester sigurá kontinuidat di kuido agudo i hospitalario.

Mester organisá e kuido efisientemente i realisá un sistema di kuido sostenibel i pagabel.

Mester implementá un transformashon berdadero di kurativo pa preventivo si nos ke mehorá salú di nos poblashon i tene e gastunan bou di kontrol i asta redusí nan riba término.

 

Banda di esakinan tin e echo ku a invertí hopi den e hòspital nobo, ku ta pone ku no a sobra sufisiente fondo pa infrastruktura di dòkter i enfermeronan pa por ofresé bon kuido. No opstante e invershonnan grandi, lo mester invertí mas den CMC pa lag’e funshoná adekuadamente. 

Esaki lo redusí referensia pa eksterior konsiderabelmente i pues baha e gastunan. 

 

Pa generá entradanan èkstra, segun Democraat, CMC mester subi terenonan regional i promové “Turismo Médiko” mas pronto posibel, dor di ofresé sierto servisionan na paisnan bisiña. Strategia ku ta generá entrada i ekstendé e merkado.

 

Partido Democraat ta konsiderá e echo ku gerensia di CMC a buska kontakto ku Hulanda, pa por yega na solushonnan duradero pa CMC, un stap den e bon direkshon. 

Sin embargo, komo kontesta riba e karta ku Gerensia di CMC a manda, Sekretario di Estado, Señor Raymond Knops, a duna di konosé ku ta for di 18 di yüni 2021 e a pone Gabinete Pisas na altura di kiko ta e pasonan ku mester keda tumá pa baha gastu i salbaguardiá kuido hospitalario na Kòrsou. 

 

Gabinete Pisas ta na turno pa aktua!