Minister di Desaroyo Ekonómiko, Ruisandro Cijntje a reuní ku representantenan di Curinde. 

Minister di Desaroyo Ekonómiko, Ruisandro Cijntje a reuní ku representantenan di Curinde. 

 

 

Willemstad, – Minister di desaroyo ekonómiko, sr. Ruisandro Cijntje a sera konosí ku Managing Director di Curinde, sra. Jacqueline Jansen i su team. Durante di e enkuentro aki a deliberá riba e vishon mutuo di atraé primeramente invershonistanan internashonal, krea kuponan di trabou i asina kontribuí na ekonomia di nos pais. Sra Jansen a elaborá riba e proseduranan, prosesonan i sertifikashonnan ku ta yuda Curinde risibí sertifikashon internashonal i posishoná Curinde i alabes gobièrnu di Kòrsou komo akshonista mayoritario den un posishon klave pa keda rekonosé internashonalmente pa invershonistanan. 

 

For di 2019 debí na sertifikashon nan di ISO Curinde a kuminsa raportá na Nashonnan Uni. Minister Cijntje a papia ku Curinde tokante di e ròl di Ministerio di Desaroyo Ekonómiko pa por asistí ku e puntonan di atenshon pa asina por fasilitá klientenan ku ta pendiente pa establesé nan mes den e área industrial komersial. 

Pa finalisá, Minister Cijntje a bishitá e tereno di zona franka na Nieuwe Haven.