KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

FARANDULA - SOSIAL - ARTENOTISIA

INFORMASHON BALIOSO  DI AMAK DURANTE PERIODO DI KRISIS COVID 19

INFORMASHON BALIOSO  DI AMAK DURANTE PERIODO DI KRISIS COVID 19

 

Direktiva di AMAK ta spera ku músikonan tur a pasa dianan di fiesta den un ambiente familiar trankil i gosando di un bon estado di salú.

Deseo di pronto rekuperashon ta bai na  nos miembro ehemplar, Gilo Garmers, pa pronto e ta riba pia den kompania di su sernan kerí.

 Naturalmente na e momentunan aki tur hende su konsentrashon ta riba e malesa kruel ku a afektá mundu kompletu ku ta Covid 19 i Kòrsou tambe no ta un eksepshon, ya ku e vírus aki a paralisá nos ekonomia kompletu i konsekuentemente tambe no tin aktividatnan horeca ta tumando lugá.

 

Nos ta kontentu ku te na e momentunan aki outoridatnan tin e situashon bou di kòntròl i sigur si nos mira sifranan spantoso, kaminda e malesa aki ta ekspandé internashonalmente, kontrali ku na Kòrsou, nos ta manteniendo e sifranan di e malesa aki abou.

 

Den tur situashon ku presentá ku ta ferfelu, tin e partinan tambe ku ta positivo. Na e momentunan aki nos tur na Kòrsou a haña momentunan pa nos reflekshoná i duna mas atenshon na nos bida familiar. Sinembargo, nos ta konsiente ku e situashon ta hopi delikado, spesialmente pa esnan ku tin un trabou kaminda nan mes ta nan doño di trabou i si nan no traha,  nan no tin entrada.

 

Den kuadro di esaki nos ta kontentu pa esfuersonan ku nos a hasi a duna resultado ya ku Gobièrnu a inkluí tambe e músikonan ku tin músika komo úniko fuente di trabou pa optené nan entrada finansiero. Lamentablemente nos a konstatá ku tin un kantidat grandi di músikonan ku ta kai den e kategoria aki ku nos a bai registrá na SOAW. 

 

Ta pa e motibu ei direktiva ke urgí pa tur esnan ku no a hasi esei, pa nan por registrá mas pronto posibel, pa asina ei nan por haña un rekompensashon finansiero di parti di Gobièrnu. Pa mas informashon por tuma kontakto ku Sra. Janice Welhous via di whatsapp na +5999 552 8872.

 

Un otro punto positivo ku nos tin ku trese dilanti ku ta resultá den e temporada aki, ta e posibilidat ku ta ser krea pa organisashonnan por re evaluá kon nan lo bai kontinuá ku nan aktividatnan despues ku situashon a normalisá. 

 

Direktiva di AMAK tambe a evaluá tur e aktividatnan ku e ta responsabel pe i den e kaso aki, esun di mas grandi i ku ta eksistí mas atenshon ta Festival di Tumba. Danki dios,  Covid 19 no a stroba kontinuashon di Festival di Tumba di karnaval 2020. Sinembargo, direktiva ta trahando riba un plan di reskate pa Festival di Tumba 2021, den kua nos lo bai evaluá:

  1. Kon por redusí sierto gastunan
  2. Kon ta evitá ku gastunan  astronómiko ku no ta den man di AMAK, ta keda kobrá di un forma eksagerá.
  3. Mester  evaluá e asuntu di refuerso di brass, unifòrm i otro gastunan adishonal, ku por adaptá pa Festival di Tumba i ku por tin influensia negativo riba  e resultado finansiero final.
  4. Mester atendé tambe gastunan di produkshon di Festival di tumba i kua  ta e pasonan ku mester tuma pa kubri esaki.
  5. Mester evaluá un posibel oumento di preis di entrada pa Festival di Tumba 2021.

Esaki ta algun di e puntonan ku direktiva lo manda pa e komishon enkabesá pa Ismael “Ike” Jesurun pa nan analisá i  bini ku rekomendashon pa reunion di evaluashon.

 

Finalmente, direktiva ta deseá tur músiko, pa sigui instrukshonnan di Gobièrnu i wak den kuadro di e instrukshonnan  aki, wak kon bo por hasi uso mas efisiente di bo tempu.

 

Ku todo poderoso drama su bendishon riba Kòrsou i mundu hinter, pa pronto e situashon aki normalisá.

 

Atentamente

 

Direktiva di AMAK

639114718427035"
639114718427035"