Playoff RBI 2021: Padres, Braves, Indians i Dodgers lo kompetí pa título kampion

November 30, 2021 REDAKSHON

WILLEMSTAD – Temporada regular a yega su final ofisialmente ayera anochi ora ku e wega entre Marchena Braves i Firebirds Padres a reanudá despues ku mester a suspendé esaki pa motibu di áwaseru djadumingu. E wega aki tabatin su balor komokiera ku e ganador lo a terminá na promé lugá riba tabla di posishon. Tabata e ekipo di Padres ku a gana Braves ku skor di 5-4. Picher ganador tabata
Sunayro Martina miéntras ku vários hungadó a konektá un hit pa Padres. Picher pèrdèdó tabata Joshua Leito i pa Braves tambe vários hungadó ku un hit.

Ku e resultado final aki Firebird Padres (10-2), Marchena Braves (8-4), Sta. Rosa Indians (7-5) i Wild Cats/St. Michiel Dodgers (7-5) ta e kuater ekiponan ku a klasifiká pa playoff final i den e sekuensia aki. Ku esaki temporada regular di RBI 2021 patrosiná pa Maduro & Curiel’s Bank a yega su final. Playoff lo start próksimo fin di siman for di djabièrnè atardi ku dos wega riba skema, un wega di kada seri. Padres lo topa ku Dodgers i Braves lo topa Indians den un seri di mihó di 3.

E promé wega di wikènt tras di lomba tabata djabièrnè atardi i Royal Scorpions a gana di Groot Kwartier Astros ku skor di 4-1. Ku e derota aki Astros a keda eliminá pa kualke posibilidat pa klasifiká pa playoff. Djasabra mainta Sta. Rosa Indians a sorprendé e lider nan di kampionato Firebird Padres ku skor di 7-6 i asina mantené nan speransa bibu pa bai playoff pendiente di nan wega di djadumingu. Despues Marchena Braves a gana fásilmente di Suffisant Royals ku skor di 22-1 i finalmente Groot Kwartier Astros a gana di Wild Cats/St. Michiel Dodgers ku skor di 12-8. Djadumingu den un wega determinante Sta. Rosa Indians ta logra otro viktoria importante di 11-10 kontra di Wild Cats/St. Michiel Dodgers pa asina garantisá nan puesto den playoff 2021.

Playoff di RBI 2021 patrosiná pa MCB lo kuminsá próksimo fin di siman for di djabièrnè na Tio Daou Ballpark ku dos wega sigur interesante. Weganan di RBI Curaçao 2021 por keda sigui di forma digital via iScore i tambe semper por bishita e website http://www.rbicuracao.com, unda por haña tur informashon i resultadonan. RBI Curaçao tin su propio twitter account tambe bou di @CuracaoRbi i ya manera sa kaba tin e página riba Facebook.