Di 6 edishon Walking Dinner di Rotary Club Willemstad éksito grandi

Di 6 edishon Walking Dinner di Rotary Club Willemstad éksito grandi

Djamars dia 30 di novèmber Rotary Club Willemstad a organisá su di 6 edishon di Walking Dinner den Pietermaai-district. Presidente di Rotary Rob Kouijzer, inisiadó di e inisiativa kulinario aki ta papia di un éksito grandi.  “E partisipantenan tabata hopi entusiasmá tokante e platonan di e  8 restorantnan ku a partisipá. Pero nan tabata kontentu tambe pa loke ta e komementu huntu na mesanan largu, den diferente grupo i den diferente restorant. Ademas ku 230 partisipante nos a rekoudá un bunita suma pa hubentut di Kòrsou.”

 

E Walking Dinner a kuminsá e aña aki ku prosecco òf serbes i un arepa na Mr Porter. Akinan e anochi a terminá tambe, un biaha mas ku un bebida i un pasaboka sorpresa dushi di Kuki Monster. Meimei di esakinan, e partisipantenan a disfrutá  di kada plato den un otro restorant, kaminda nan por a purba diferente spesialidat i signature dishes. “Un anochi kulinario eksitoso, sigun Nienke Ingenhoven, Rotary Fellow: “ Hopi bunita ku nos a logra haña tantu hende asina aki huntu pa pasa un dushi anochi i naturalmente rekoudá un bon suma pa un bon kousa”.

 

Na Europa diferente Rotary Clubs ta organisá Walking Dinners. Pa Rotary Club Willemstad tabata di 6 edishon, i e aña aki tambe nan por a konta ku sosten di diferente restorant. Asina Mundo Bizarro, Ginger, BijBlauw, Los Caballeros, Black Jack, Serafina, Obaar i Rozendaels a pone mesanan disponibel pa e evento akí.

Benno van Leeuwen, Rotary co-president i miembro di e komishon di Walking Dinner: “Tabata tremendo mira tantu hende entusiasmá asina huntu. No solamente pa huntu disfrutá den un ambiente kulinario, pero mas ku esei pa rekoudá fondo pa un bon kousa. Teniendo na kuenta medidanan di Covid e evento tabata eksitoso i nos a logra rekoudá un bunita suma.”

 

Mas informashon tokante Rotary Club Curaçao Rotary Club Willemstad RCW ta un service club hopi entusiasmá i dushi. E 37 miembronan ta lùnch kasi semanalmente na Avila Beach Hotel i ta traha aktivamente pa sostené komunidat di Kòrsou. Esaki nan ta hasi pa medio di proyektonan hands on manera e Roefelproject di Cura Doet, proyektonan pa hóben manera e wikènt di liderazgo di RYLA,  i eventonan pa rekoudá fondo manera  Duck Gala pa diferente bon kousa i prinsipalmente pa hubentut. Durante añanan ku a pasa RCW a sostené un gran kantidat di bon kousa, manera Fundashon Desaroyo i Progreso, Bikes4kids, Jeugdtheaterschool Drazans, Capriles kliniek, Kinderopvanghuis Encilia, GreenKidz, Fundashon pa maneho di adikshon, Hospice Arco Cavent, Bos di hubentut, Tur ta konta, Casa Cuna Mercedes Winkel, Fundashon Prevenshon, proyektonan di biblioteka i diferente inisiativa mas chikitu.

 

Fotografia Inge van Altena