E reseta pa dominá oumento di preis! Ku yoramentu so no ta gana nada.
E reseta pa dominá oumento di preis!
Ku yoramentu so no ta gana nada.
Willemstad — Ménos produkshon, flete hopi mas karu i konfushon logístiko, mundialmente ta resultá den importashon mas kostoso. Na lugá di kue e toro na su kachu, na Kòrsou esnan responsabel pa direkshon di pais, ke atendé e situashon (1) kulpando mala fe di komersiante, (2) proponiendo kontrol total di preis, lubidando ku nos ta den un merkado liber i (3) lantando mas fundashon ku despues ta sali foi kontrol. Pa ta spesífiko, minister di ekonomia ta papiando di lanta un consumentenautoriteit, ma di otro banda ta sigui neglishá Fundashon pa Konsumidó.
Mas lamentabel ta ku miéntras e ta buska solushon pariba pabou, gobièrnu mes ta surdu i muda ora di stimulá mas produkshon lokal di kuminda i ora di adaptá e impuestonan riba importashon en general i riba flete en partikular. Esaki ta straño paso hustamente esei nan ta e instrumentonan ku gobièrnu tin direktamente den su man. Pues atrobe un gobièrnu i koalishon dunando señal di un lam, un siegu.
Reseta
Den e presupuesto aprobá siman pasá, tin kasi literalmente skibí ku gobièrnu ta drecha su pará finansiero, esta ta risibí mas impuesto, dor di produktonan importá i flete mas karu. PIN ta puntra: promé ku kuminsá duda den e forsa di kompetensha i merkado liber òf promé ku krea mas burokrasia, di kon no simplemente adaptá derecho di importashon i OB riba importashon ya kosto di importashon ta subi ménos? Por asta pensa pa hasi esaki temporalmente i/òf pa sierto tipo di produkto.
Partido PIN ta puntra tambe: promé òf banda di buska otro pais pa importá for di dje, di kon no hasi un todo por todo pa oumentá nos produkshon lokal di kuminda?
Den ménos ku 3 aña di gobernashon PIN a dòbel e kontribushon di agrikultura na nos ekonomia. Ma ainda falta mas paso ekspertonan a kalkulá ku di e 500 mion na kuminda ku nos ta importá, nos por produsí 200 mion nos mes. Pa por logra, e propio minister di ekonomia mester firma e dekreto pa agrikultornan profeshonal haña awa hopi mas barata, manera èks-minister Camelia-Römer a dil ku nos kompania di awa i manera aprobá pa BTP komo reguladó. Di otro banda, ta na e minister di GMN pa duna bida na e mesun Fondo Agrario ku èks-ministernan Whiteman i Camelia-Römer a usa eksitosamente pa ranka produkshon lokal.
Por último, komo partido humanista-kristian, PIN ta kere den empoderashon i den laga e komunidat hasi loke e mes por hasi. Pesei PIN ta insistí pa promé ku buska pa plak steker di ‘mala fe’ riba e komersiante òf promé ku lanta un fundashon mas ku tur su gastunan di direktor, hunta di komisario, edifisio, sekretaria etc.etc., mihó fortifiká Fundashon pa Konsumidó di moda ku e por empodera e siudadano ainda mas pa e mes disidí konsientemente kiko, kuantu, ki ora i na unda e ta kumpra. Na final di dia, niun komersiante no por gana un konsumidó konsiente.
Gol sin kiper
Loke Partido PIN ta proponé aki no ta nada espektakular. Ta pasonan ku kualke pais i mandatario lo tuma si e ta pasando den un krísis manera nos pais ta pasando aden. Es mas, ku diferente programa manera Kunukito i training den téknika di agrikultura moderno i duradero, Partido PIN a demostrá ku komunidat ta kla pa hinka man den tera. Na su turno, e dekreto di awa barata a proba ku ta posibel hasi diferensiashon spesífiko den tarifa, basta nos ke.
Pa gobièrnu Pisas lo ta gol sin kiper si e djis bolbe lihé riba e ruta ku PIN ya a stipulá.
