Kòrsou nombrá komo miembro ehemplar di ICCAT Ramon Chong ta wòrdu eligí komo segundo vice-presidente di ICCAT Kòrsou ta logra prolongá su miembresia koperativo di  (WCPFC)

 

Kòrsou nombrá komo miembro ehemplar di ICCAT

Ramon Chong ta wòrdu eligí komo segundo vice-presidente di ICCAT

Kòrsou ta logra prolongá su miembresia koperativo di  (WCPFC)

 

Willemstad, 6 desèmber 2021 – Ku sumo plaser Minister di Desaroyo Ekonómiko, sr. Ruisandro Cijntje kier a informá ku den e di 27 reunion annual di International Convention for the Conservation of Atlantic Tunas (ICCAT) ku a tuma luga entre 12 pa 23 di Novèmber último, sr. Ramon Chong, den sun kalidat komo presidente di Komishon di Peska Internashonal, na nomber di Kòrsou, sostené pa Latino Amerika i luego pa Union Oropeo i Hapon a wòrdu eligí pa aklamashon dor di su 52 miembronan pa e puesto di Segundo Vise Presidensia di ICCAT. Ku e posishon atkerí aki Kòrsou a konsolidá su posishon den ICCAT, representandó region Latino Amerika i Caribe pa sigui duna un aporte na desaroyo ekonómiko di peska internashonal di Kòrsou ku na su turno lo benefisia desaroyo duradero di e sektor di peska lokal di Kòrsou.  

 

Kòrsou tin intenshonnan serio pa sigui desaroyá e industria di peskeria internashonal ekonómikamente di un manera sostenibel i responsabel. Awor ku Kòrsou tin e segundo vise presidensia den e organisashon, esaki ta duna e posibilidat pa por logra yega na informashon, konosementu i un ‘netwerk’ mas grandi na benefisio i interes di desaroyo di peska en general. Ta di spera ku esaki lo resultá den negoshamentu di kuotanan mas grandi i asina atraé mas barku pa registrá na Kòrsou den futuro i logra generá mas entrada pa desaroyo di nos sektor di peska lokal.

 

ICCAT ta manehá e kantidat di e diferente tipo di tuna den Oceano Atlántiko, hasiendo uso di métodonan di peska moderno pero alabes responsabel. E tipo di tuna ‘Big Eye’ta birando mas skars i esei ta buta ku e organisashon internashonal ta pone eksigenshanan ku paisnan ku ta miembro mester kumpli kuné i Kòrsou ta kumpli ku tur eksigensianan di ICCAT. Es mas, Kòrsou ta wordu menshoná komo un pais miembro ehemplar ku ta monitoria, kontrolá i supervisá na un nivel haltu i ta kumpli kabalmente ku tur eksigensianan di ICCAT.

 

Korsou komo miembro di ICCAT tin benefisio ekonómiko den tres area.

Ta trata di impakto ekonómiko direkto i indirekto ku Kòrsou ta generá. Ta trata di divisa ku ta wordu generá pe pais, dor di lisensianan i tambe empleo pa nos isla. E di tres area ta e posibilidat pa atkerí konosementu i medionan pa desaroyá su peska lokal.

 

Ta asina ku aktualmente Kòrsou tin 16 barku aktivo registrá ku ta opera bou di bandera di Kòrsou den awanan internashonal ku ta ser manehá i kontrolá pa ICCAT, di kual 5 barku ku ta piska, 8 barku transportado di piska i tres barku ku ta sostene e peskeria. Dor di e miembresia aki e barkunan por piska sin ningun problema den awanan internashonal i/o e ‘Regional Fisheries Management Organization’ (RFMO) ku Kòrsou ta miembro di dj’e. 

 

Dor ku e barkunan aki ta piska bou di bandera di i ku lisensia di Kòrsou, nan tin oportunidat pa eksportá e piská na paisnan di entre otro Union Europeo. Esaki ta trese entrada pa pais Kòrsou ku tambe ta un fuente di divisa pa nos pais dor ku e pago ta ser hasi den valuta ekstranhero. E doñonan di e barkunan aki a estabelese diferente kompanianan lokal ku ta generá empleo pa nos hendenan lokal. E barkunan aki tambe tin ku paga pa registrashon na outoridat maritimo di Korsou.

 

Alabes Minister di ekonomia sr. Ruisandro Cijntje ta informá ku den un reunion ku a termina djadumingu. 5 desèmber último, Kòrsou su miembresia a keda prolonga den e reunion plenario anual di Western and Central Pacific Fisheries Commission (WCPFC). Tur pais miembro unanimamente a aprobá prolongashon di miembresia di Kòrsou komo “Cooperating Non-Contracting Party (CNCP)” di WCPFC. E status aki ta duna Kòrsou e posibilidat di por bandarea mas barkunan di peska pa transporta piska kohí den e area aki.  

 

Prolongando miembresia di WCPFC ta hasi posibel ku ya kaba Kòrsou lo banderea por lo menos dos barku mas di Greensea Group ku ta konsistí di Seatrade i Greensea. E ofisina prinsipal di e dos organisashonnan aki ya ta ubika na Korsou kontribuiendo ku primanan sosial i tambe impuesto. Nan lo transporta piskanan for di area di WCPFC pa diferente areanan mundialmente. 

 

Pa próksimo añanan, por spera ku Kòrsou lo sigui habri su halanan pa bira miembro di más organisashon mundial, e asina yama RFMOs, pa por kubri mas areanan di peska.

Minster di Ekonomia, sr. Ruisandro Cijntje kier a manda su felisitashon na pueblo di Kòrsou ku e gran logronan aki.

 

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: