Minister Cijntje ku bishita di trabou na Colombia
Minister Cijntje ku bishita di trabou na Colombia
WILLEMSTAD – Minister di Desaroyo Ekonómiko Ruisandro Cijntje a biaha pa Colombia djadumingu 12 di desèmber 2021 pa un bishita kòrtiku na Bogotá, pa despues e biaha pa Medellín pa tene kombersashon ku tantu e sektor privá komo gobièrnu. Finalmente Minister Cijntje lo regresá Kòrsou riba e buelo inougural di Sarpa Airlines dia 16 di desèmber pròksimo. Presidente di Kámara di Komèrsio i Industria di Kòrsou Sr. Billy Jonkcheer i Direktor di Ofisina di Turismo Sr. Hugo Clarinda tambe a biaha huntu ku Minster Cijntje.
Djaluna mainta Minister Cijntje lo tin un reunion ku Minister di Komèrsio, Industria i Turismo di Colombia Honorable Maria Ximena Lombana. E mandatarionan lo diskutí státus di e akuerdo komersial ku ta den negosiashon i lo stipulá konhuntamente un fecha límite pa finalisá e trabounan. Esaki siguí pa un almuerso riba invitashon di Embahador di Reino na Colombia Sr. Ernst Noorman pa dialogá tokante desaroyonan i kon por estrechá e lasonan ku Embahada di Reino, pa asina logra nos metanan. Despues di e almuerso minister lo risibí un presentashon di Holland House ku ta un organisashon ku ta fasilitá eksportashon i invershon for di Hulanda i tambe otro partinan di Reino i vise versa. Aki minister lo haña un bista di e trabounan i kon nos empresanan a destaká riba e merkado Colombiano. Kámara di Komèrsio di Kòrsou, Cinex i Ofisina di Turismo tin un representashon den Holland House.
Na Medellín Minister Cijntje lo topa ku gobernashon di Antioquia i Medellín pa elaborá tokante státus di e MOU ku ta na vigor aktualmente entre e dos teritorionan i Kòrsou. Tambe lo tin un enkuentro ku vários representante di sektor privá ku lo duna un bista riba e desaroyonan i posibilidatnan pa entrega di produktonan agropekuario i otro komestibelnan na un preis mas kompetitivo mirando e desaroyo- i tendensianan den e área akí. E akuerdo komersial entre Kòrsou i Colombia ku ta kasi na fin di negosiashon por trese un alivio grandi pa pueblo. Minister Cijntje ta determiná pa atendé ku e situashon di subida di preis i lo probechá papia na Colombia ku proveedornan pa asina haña un mihó bista di e situashon.
Konektividat
Djaweps minister lo biaha riba e buelo inougural di Sarpa Airlines pa Kòrsou. Un di e áreanan ku e MOU entre Kòrsou i Medellín ta kubri ta konektividat aéreo i ku beneplásito ta anunsiá ku esaki a keda konkluí eksitosamente. Dia 2 di desèmber último EZ Air di Kòrsou a inisiá buelonan entre Kòrsou i Medellín Dia 16 di desèmber awor Sarpa Airlines di Colombia tambe lo inisiá buelonan entre Kòrsou i Medellín i dia 21 di desèmber lo toka turno na Jet Air di Kòrsou pa start ku buelo entre Kòrsou i Medellín. E tres konekshonnan akí ta sòru pa un konektividat máksimo entre Kòrsou i e siudat Paisa Medellín, kual ta un estímulo grandi pa Turismo i tambe pa negoshi. “Colombia ta un merkado grandi ku hopi rekurso i ta un aliado komersial importante pa Kòrsou”, Minister Cijntje ta indiká.