*Eldrion Regina ta keda instalá komo Presidente nobo pa Marchena Braves*
*Eldrion Regina ta keda instalá komo Presidente nobo pa Marchena Braves*
WILLEMSTAD – Durante wikènt ultimo e ekipo di beisbòl lokal Marchena Braves a instalá su direktiva nobo pa aña 2022. E hoben adulto, konosí pa e proyekto ” Un focus diferente”, Eldrion Regina, ta esun ku tin e aspirashon i konfiansa pa bai duna guiá na e organisashon kompletu di Marchena Braves, tantu Hubenil, klase A komo tambe AA i guiá e organisashon pa stapnan grandi i positivo ku pronto e organisashon lo bai komparti ku komunidat.
Eldrion Regina sigur no ta un persona deskonosí pa e organisashon di Marchena, mirando ku for di Senior League e la hunga bala pa e ekipo di “Marchena Hardware”.
Presidente nobo Eldrion Regina a konta ku defuntu Shon Ki Nicasia, tabata esun ku a mira un potensial den su persona. Shon Ki ku su manera uniko a duna guiá na diferente pelotero di nos isla ku awe ta profeshonal den Major League Baseball manera Didi Gregorius, Andrelton Simmons, Jurickson Profar I Kenley Jansen. E potensial ku defuntu Shon Ki Nicasia a tuma nota di dje den ami komo Eldrion Regina, ta e mesun potensial ku lo mi kier pa kada persona, for di esun mas yòn te pa esun di mas edat kuminsa mira den otro.
Defuntu Shon Ki Nicasia a mira un potensial den Eldrion pa e deporte di beisbòl ku E mes no tabata sa, i ku yudansa i e perseveransia nesesario, a pone ku komo hoben Eldrion tambe a forma parti di e promé tim di Senior League ku a bira Kampion Senior League World Series na 2002.
Mas aleu e presidente nobo Eldrion Regina a splika ku e organisashon di Marchena Braves, no ta un organisashon ku fondo, ni tampoko nòmber nan grandi òf konosí den dje, pero si nos kada unu mira e potensial chikitu den un otro, huntu e organisashon lo krese. Tambe a presentá e direktiva nobo di Marchena Braves ku ta konsistí di:
General Manager: Quincy Virginie
Presidente: Eldrion Regina
Vise presidente: Derick Colina
Segundo Vice Presidente: Tony Passial
Tesorero: Rosa Sille
Segundo Tesorero: Lucille Tremus
Komisario: Gianni Sille
Segundo Komisario: Sharline Schmidt
Secretaria: Kristel van Putten
Segundo Secretaria: Indra Sille
Manager MB AA: Gilmar Velder (lòs for di direktiva).
Marchena Braves sigur lo bai konosé diferente kambionan positivo pa aña 2022 komo organisashon i lo bai komparti esakinan ku komunidat, pa asina nan sera konosi ku e organisashon, pero tambe laga hobennan den e organisashon desaroyá nan mes den e deporte di beisbòl.
