Giselle Mc William: Hopi hende ta puntra mi kiko ta mi opinion riba lokual a pasa ayera ku e èks Minister di BPD sra.Lew yen Tai i gev min. sr.Manuel.

Na promé luga mi ta konsiderá esaki pa mi pais un momento tristu.

Pa loke ta trata e situashon di Min BPD , for di desèmber nos di MANPIN tabata BON na altura di kiko a pasa , pero nos di MANPIN hamas lo hasi politíka ku e tipo di susesónan aki , pasombra nan ta tristu , e ta hasi dolor i ta afektá no solamente e persona ,pero tambe henter un famia.

Pa loke ta trata gev min , na diferente okashon más ku 3 aña pasa mi a papia ku gev min i konsehé , pero alfinal tur hende ta hasi loke nan pensa ta mihó i mester karga e konsekuensianan.

Lagami korda ku den kabinete Rhuggenaath tambe nos mester a mira dos minister baha i mi sá kon dolor esaki ta.

Mi sá tambe kiko ta ora bo ta mira kontrikantenan politíko disfrutá di esaki ora un profeshonal , un mama i un tata mester baha komo minister.

Komo hende , komo muhé i mi kurason di mama i lider politíko , ami hamas lo selebrá dolor di otronan , meskos mi partido maske ta kontrikantenan politíko.

Pero pa MANPIN nos ta enfatisá ku mester rèspèta nos estado di derecho, nos leinan i integridat di nos pais riba tur hende ken ku e ta i riba tur situashon.

Mi ta desea tantu sra.Lew yen Tai i sr.Manuel hopi forsa i ku Dios duna boso forsa pa superá e etapá aki den seno di boso sernan kerí.