MINISTER DI HUSTISIA GILMAR PISAS A LANTA KOMISHON PA KUMINSÁ E PROSESO DI REORGANISASHON DI SDKK

MINISTER DI HUSTISIA GILMAR PISAS A LANTA KOMISHON PA KUMINSÁ E PROSESO DI REORGANISASHON DI SDKK

 

Willemstad  – Minister di Hustisia Gilmar Pisas a lanta komishon pa kuminsá e proseso di reorganisashon di SDKK.

 

SDKK tin algun tempu kaba ku eskases haltu di personal i trahadónan malkontentu. Ta hopi importante pa atendé e funshon i posishonnan hurídiko di e personal mas pronto posibel. 

 

Pa e motibunan ariba menshoná, Minister di Hustisia sr. Gilmar Pisas a duna e tarea na dos empleado públiko pa kuminsá e proseso di reorganisashon di SDKK. 

Ta trata aki di sra. Vensca Leander i sra. Runilla Regina. 

Sra. Leander a studia Human Resource i tin mas di 20 aña di eksperensia riba e tereno aki i sra. Regina ta un politikólogo i a fungi años komo ‘Beleidsmedewerker’ i tabata hefe di Departamento di Reibeweis.

 

E komishon lo konstití di e dos personanan ariba menshoná, mas tres representante sindikal. E sindikatonan ta SAP, StrAF i ABVO. 

E komishon tin ku konsehá Minister di Hustisia enkuanto reorganisashon di SDKK pa yega na solushonnan struktural pa un funshonamentu optimal di e prizòn.

 

E intenshon ta pa durante e próksimo 6 lunanan, kuminsando na yanüari 2022, e komishon traha riba reorganisashon di SDKK.

Lo tin seshonnan kaminda e trahadónan di SDKK lo risibí informashon enkuanto e proseso di reorganisashon.