Partido Democraat: Akuerdo di Gobernashon Hulandes ta duna perspektiva alentador pa Kòrsou pero na mes momentu tin un ‘addertje onder het gras’ ku mester paga bon tine kuné

 

Partido Democraat: Akuerdo di Gobernashon Hulandes ta duna perspektiva alentador pa Kòrsou pero na mes momentu tin un ‘addertje onder het gras’ ku mester paga bon tine kuné

Partido Democraat a tuma nota ku satisfakshon di e intenshon di e koalishon Hulandes nobo ku akshonnan konkreto pa stimulá desaroyo di Kòrsou. Esakinan a keda ankrá den e Akuerdo di Gobernashon titulá: “Omzien naar elkaar, vooruitkijken naar de toekomst”. 

Den e Akuerdo di Gobernashon e partidonan ta mira e importansia pa kolaborá i yuda Kòrsou riba diferente area, pero muy en espesial pa loke ta trata desaroyo ekonómiko i enseñansa. 

Partido Democraat semper a bin ta bisa ku desaroyo ekonómiko i invershon den enseñansa ta pilarnan fundamental pa logra saka Kòrsou for di e situashon ku e ta aden. P’esei nos ta satisfecho ku, por ehèmpel, Hulanda, ta bai pone pa desaroyo ekonómiko di Kòrsou fondonan di garantia di “Rijksdienst voor Ondernemend Nederland” disponibel. 

Ku esaki e Gobièrnu Hulandes ta garantisá un porsentahe di fiansanan, ku ta hasi finansiamentu lokal di diferente proyekto posibel i asina brinda mas oportunidat pa nos hendenan lokal hasi negoshi. 

Ku e “Nationaal Groeifonds”, Gobièrnu Hulandes ta pone 20 miyar euro disponibel pa proyektonan den Reino pa un periodo di 5 aña pa stimulá kresementu ekonomiko duradero i di forma struktural. 

Loke ta positivo ta ku inovashon ta resaltá den hopi di e puntonan pa loke ta e ayudo pa Kòrsou. 

E akshonnan konkreto menshoná den e Akuerdo di Gobernashon ta suprayá un biaha mas e importansia pa enfoká riba kresementu ekonómiko pasó esaki ta bai yuda nos awor i den futuro. Basta si, ku nos ta karga nos responsabildat i ku seriedat i kapasidat atendé e kosnan pa no pèrdè e oportunidatnan di oro aki. 

Partido Democraat ta kere firmemente den un kolaborashon estrecho entre paisnan den reino i sigur ku Hulanda, mirando ku e ta un di e paisnan ku un ekonomia mas fuerte i riku. Nos mester probechá di esaki. 

Lokual Partido Democraat si no ta di akuerdo kuné ta pa negoshá posibel kambionan den Statuut aworaki. Nos ta pasando den un krisis i no tin tempu ni atenshon pa negoshá Statuut aworaki. 

Democraat ta sugerí Gabinete Pisas pa no drumi i tuma akshon mesora i ku firmesa pa huntu ku stakeholders kapitalisá riba e oportunidatnan presentá. 

Tambe nos ta urgi gabinete Pisas pa mustra balentia, kapasidat i forsa di konvikshon pa kita e parti di negoshá Statuut for di mesa. Ta awor ta momentu pa gabinete Pisas mustra su kapasidat i sabiduria.

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: