Minister Xiomara Maduro ta spera di por logra refinancia e debe di 904 miyon florin cu Aruba tin cu Hulanda pa motibo di COVID19

Minister Xiomara Maduro ta spera di por logra refinancia e debe di 904 miyon florin cu Aruba tin cu Hulanda pa motibo di COVID19

E ora lo mester cubri solamente e debe local y e deficit pa por ehecuta Presupuesto pa aña 2022

ORANJESTAD – Minister Maduro ta brinda informacion riba e necesidad financiero den Presupuesto 2022 pa Pais Aruba. E aña aki tin un necesidad financiero total di 1651 miyon florin di cual 1360 miyon ta bay na servicio di debe, 110 miyon ta bay debe local y 291 miyon florin ta di e deficit presupuestario. Den e 1360 miyon florin tin e suma di 904 miyon florin cu ta consisti di e fiansanan ‘bulletlening’ cu Aruba a haci cu Hulanda pa asina por a ehecuta y cubri gastonan di gobernacion di Presupuestonan di aña 2020 y 2021 y tambe pa por a brinda Subsidio di Salario den aña 2020 y 2021. Na april 2022, e ‘bulletleningen’ aki ta madura. Minister Maduro ta spera di por logra refinancia e debe aki di 904 miyon florin cu Hulanda. Si logra, e ora lo mester cubri solamente e debe local y e deficit pa por ehecuta Presupuesto pa aña 2022.

 

A cuminsa negosha cu Hulanda pa refinancia

Ya for di aña pasa a cuminsa negosha cu Hulanda pa asina por haya refinancia e debe aki haci pa Aruba por surpasa e efecto financiero y economico cu COVID19 a trece cune pa nos Pais. E negociacion mester a ser para, mirando cu mester a warda pa e Gobierno nobo di Hulanda forma. Awor cu e formacion ta tras di lomba, ta spera cu pronto lo por tin un decision pa por refinancia e debe aki di 904 miyon florin cu Hulanda.

 

Lo mester busca fondo pa financia e debe local y e deficit

Manera treci dilanti, e necesidad financiero pa 2022  ta consisti di debe internacional, debe cu Hulanda, debe local y e deficit presupuestario. Si logra yega na un acuerdo cu Hulanda pa refinancia e debe di 904 miyon florin, e ora lo mester busca fondo solamente pa e debe local y e deficit, ya cu e debe internacional ta cubri caba. Pa e ultimo aki Aruba a haya fondo for di Hulanda na september 2021. Pa financia e debe local lo acudi na e mercado di capital local manera a acorda cu Hulanda. E deficit lo mester wordo financia sea via sosten di likidez di Hulanda of busca riba e mercado di capital local. Ta trata di un suma total di 401 miyon florin cu lo mester busca pa por haya ehecuta Presupuesto 2022.

 

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: