Aksidente di tráfiko ku dos morto i tres herido.

 

KOMUNIKADO DI PRENSA 027 /2022
17 yanüari 2022
Aksidente di tráfiko ku dos morto i tres herido.
Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ

Djaluna 17 di yanüari 2022 alrededor di 20.17’or, Sentral di Polis a risibí diferente yamada
di un aksidente bastante serio ku a tuma lugá riba Weg Naar Westpunt bij Wacawa,
kaminda tabatin tres vehíkulo enbolbí.
Na yegada di e unidatnan di Barber, nan a bin topa dos vehíkulo, di kua un pikòp i un mini
vèn ku a dal frontal den otro.
Na e otro banda di kaminda a bin topa un otro pikòp parsialmente den mondi.
For di investigashon preliminar ku polis a realisá na e sítio a sali na kla ku dos pikòp tabata
bayendo den direkshon di Westpunt tras di otro.
Diripiente e pikòp ku tabata kore dilanti a baha for di kaminda i bai kore den skual.
Pa evitá un dalmentu, e pikòp ku tabata kore su tras a bai hala riba su man robes i dal
frontal kontra di e mini vèn ku tabata bini for di Westpunt bayendo den direkshon di
Barber.
E dos okupantenan di e pikòp ku a dal den e mini vèn a sufri herídanan di menos gravedat i
a keda transportá ku ambulans pa sala di emergensia di C.M.C.
Tantu e shofùr di e mini vèn ku ta un hende hòmber komo e ko-okupante ku ta un dama, a
fayesé na e sítio di aksidente mes.
Dòkter di polis a konstatá morto di ámbos.
Shofùr di e pikòp ku a kore den skual i resultá parsialmente den mondi tambe tabatin
herídanan leve i a keda tratá na e sítio mes.
Debí ku famianan no a keda notifiká ainda, no por duna identidat di e dos víktimanan ku a
fayesé liber.
Departamentu di Tráfiko ta kontinuá ku e investigashon.

This site uses Akismet to reduce spam. Learn how your comment data is processed.

%d bloggers like this: