Gezaghebber Rijna a paga su kontribushon di naturalesa pa 2022
Gezaghebber Rijna a paga su kontribushon di naturalesa pa 2022
Kralendijk- Gezaghebber Edison Rijna a paga su kontribushon di naturalesa. Pago di e kontribushon di naturalesa pa sambuyadónan di 45 dòler ta preskribí pa lei, pa tur hende ku kièr sambuyá den Parke Marino Nashonal di Boneiru. Aunke a introdusí e sistema di pago online na 2019, tòg ta posibel ainda pa paga e kontribushon di naturalesa via tonbank di e tiendanan di buseo i na e ofisinanan prinsipal di STINAPA.
Gezaghebber Rijna a risibí e plachi di edishon limitá komo suvenir. E aña aki e plachi aki ta traha kompletamente di material resiklá, un paso grandi pa loke ta trata e produkshon di e plachi nan aki i pa medio ambiente di nos isla. Tur hende ku paga e kontribushon di naturalesa, por risibí un plachi di edishon limitá komo suvenir. E plachi akí no ta un komprobante di pago, ya ku ainda lei ta eksigí ku mester kana ku e komprobante di pago di papel.
Pa paga e kontribushon di naturalesa por bai riba stinapa.bonairenaturefee.org. Bishitá stinapabonaire.org pa mas informashon tokante e kontribushon di naturalesa.
