Proyekto Pal’i Mangel na Ref
Presidente di Parlamento di Kòrsou
Señora Ch. America-Francisca
Wilhelminaplein # 4
PRESENTE
Willemstad, 27 di yanüari 2022
Tópiko: Petishon pa dirigí pregunta na Minister di Tráfiko, Transporte i Planifikashon Urbano
Señora America-Francisca,
Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di Tráfiko, Transporte i Planifikashon Urbano, Charles Cooper.
Danki pa e koperashon.
Atentamente,
Juniël Carolina
Parlamentario pa
frakshon di MFK
Minister di Tráfiko, Transporte i Planifikashon Urbano
Señor Charles Cooper
PRESENTE
Kòrsou, 27 di yanüari 2022
Tópiko: Proyekto Pal’i Mangel na Ref
Apresiabel señor Minister Cooper,
Pa medio di esaki suskrito Juniël Carolina, miembro di Parlamento di Kòrsou pa frakshon di MFK ta aserka bo persona komo minister enkargá ku Tráfiko, Transporte i Planifikashon Urbano (VVRP) ku lo siguiente:
Na promé lugá pèrmiti mi, felisitá bo persona komo minister enkargá ku Tráfiko, Transporte i Planifikashon Urbano pa e forma profeshonal i serio ku bo ta ehersé e trabou ministerial i spesialmente pa e manera ku bo persona ta duna atenshon i dedikashon di tur e tantísimo problemanan ku tin den e ministerio .
Nos a tuma nota ku no ta muchu kla, pa nos frakshon i na komunidat kon leu ta ku avanse i terminashon di e proyekto Pal’i Mangel na Ref. Tambe nos a tuma nota di un karta ku a drenta na parlamento fechá 20 di yanüari 2022 di “Grupo 6(G-6)” kaminda ta ser menshoná ku un kontratista a pone beslag riba e parke pa motibu di debe. Si esaki ta bèrdat e ta trese mas duda riba e kontinuashon i terminashon di e proyekto. Tambe e “Grupo 6(G-6)” ta informá parlamento ku dia 9 di yanüari 2022 ministerio di VVRP a saka un komunikado di prensa i a indiká ku e persona di kontakto pa ku e proyekto aki ta señora Tely Pikery. Komunidat ta ansioso i ta den espera pa sa ki dia e parke aki ta habri pa públiko konsiderá ku ya kaba den desèmber último prinsesa Beatrix a haña un rekorido di e proyekto aki.
Apesar di tur e promesanan pa drecha e sistema di riolering di CMC i Otrabanda, a bin na nos atenshon ku te awe awanan sushi i seriamente kontaminá di CMC i di Otrabanda ta wòrdu deskargá den e área di Palu di Mangel na Ref.
Frakshon di MFK hasiendo uso di e derechi di hasi pregunta ankra den artíkulo 96 di reglamentu di órden i tambe artíkulo 57 di areglo di estado, na nòmber di nos frakshon mi kier hasi señor minister Cooper e siguiente preguntanan:
- Minister ta na altura di e último keho i remarke ku tin riba henter e proyekto di Pal’i Mangel ?
- Minister por informá kiko tabata e planifikashon original pa loke tabata e komienso i finalisashon di e parke di Palu di Mangel fase 1?
- Kuantu ta e gastunan te awor aki pa e proyekto di Pal’i Mangel?
- Kuantu e e kaya pega ku e proyekto aki a kosta?
- Pa finalisá e proyekto, kiko ta e último trabounan ku mester wòrdu realisá i ki dia por mira kontinuashon di e trabounan ?
- Kuantu plaka mas mester invertí pa finalisá e proyekto? E sèn aki ta presupuestá ?
- Den karta di “G-6” por a lesa ku tabatin òf tin beslag buta riba e proyekto pa motibu di debe. Esaki ta bèrdat ?
- Si e kontesta ta si, ta kuantu sèn debe e kontratista i si ta nò ki dia ta kontinuá ku e proyekto ?
- Ta bèrdat ku e palunan uza den e konstrukshon di e proyekto a kuminsá lanta i asta putri? E material(palu) ta di kalidat inferior?
- Si e materialnan di bèrdat a kuminsa daña i putri ken ta responsabel pa e materialnan aki?
- Ki garantia tin pa loke ta trata kalidat, durabilidat i tempu ku nan tin?
- Konsiderá ku e área di ambiente agresivo di laman (salpeter) i di solo ku nos ta
aden, ken i kon ta mantené e parke?
- Ki areglo tin pa loke ta trata mantenshon di e totalidat di e proyekto riba término largu ?
- Manera nos a komprondé ku aktualmente tin vigilansia ku kachó den e parke.
A tene kuente ku e área aki tin diferente para ta habitá?
Sperando ku Minister lo kontesta nos karta den e tempu definí den e protokòl firma entre gobiernu di Kòrsou i Parlamento.
Atentamente ,
Juniël Carolina
Miembro di Parlamento
pa frakshon di MFK