PROMÉ MINISTER GILMAR PISAS HUNTU KU MINISTER DI FINANSA JAVIER SILVANIA A REUNÍ KU SEKRETARIO DI ESTADO ALEXANDRA VAN HUFFELEN RIBA E NOTA DI KAMBIO DI E LEI DI KONSENSO DI REINO COHO

PROMÉ MINISTER GILMAR PISAS HUNTU KU MINISTER DI FINANSA JAVIER SILVANIA A REUNÍ KU SEKRETARIO DI ESTADO ALEXANDRA VAN HUFFELEN RIBA E NOTA DI KAMBIO DI E LEI DI KONSENSO DI REINO COHO

 

Willemstad – Promé Minister Gilmar Pisas huntu ku Minister di Finansa Javier Silvania a reuní ku Sekretario di Estado Alexandra van Huffelen di 31 di yanüari 2022.

Den e reunión aki tabata presente tambe Promé Minister di Aruba Evelyn Wever-Croes i Promé Minister di Sint Maarten Silveria Jacobs.

 

E meta di reunion tabata pa atendé e nota di kambio di e Lei di Konsenso di Reino COHO.

 

Promé Minister Pisas por a atendé diferente punto di preokupashon ku Kòrsou tin pa ku e nota di kambio. 

E preokupashonnan aki ta enserá e outoridatnan adishonal ku kier otorgá na CFT den e nota di kambio.

E nota di kambio ta produkto di 5 luna di negosashon tékniko entre amtenarnan di e kuater paisnan. A yega na solushonnan viabel basa riba aporte di e timnan negosiador, pero a keda algun punto di preokupashon.

 

Den e reunion aki Promé Minister Pisas a pidi pa bini ku un akuerdo por eskrito den kual ta inkluí tur e puntonan di preokupashon ku a bini dilanti pa por tene kuenta ku esakinan den e proseso di implementashon.

 

E respektivo Parlamentonan di kada pais den Reino tambe lo haña e oportunidat pa plantea kualkier preokupashon ku nan tin i proponé amienda durante di e debatenan ku ta bai tin riba e Lei di COHO.

 

Na final di e reunion Promé Minister Pisas a bisa Sekretario di Estado van Huffelen ku Kòrsou ta keda en espera di su bishita di trabou den luna di febrüari próksimo.