Situashon di trafiko insigur den kaya Mikeas

 

Willemstad, 13 febrüari 2022

 

Situashon di trafiko insigur den kaya Mikeas

Pa basta tempu kaba habitantenan di kaya Mikeas ta pidi atenshon di gobièrnu pa e situashon di tráfiko insigur ku nan ta bibando aden. 

 

Nos di Partido Inovashon Nashonal (PIN) a keda aserká pa un grupo di habitante ku ta biba den kaya Mikeas ku e preokupashon grandi, ku nan ta sinti nan mes insigur pa e situashon peligroso di tráfiko, ku tin den kaya Mikeas.

 

Kaya Mikeas 

Kaya Mikeas ta un kaya den bario di Zapaté ku pa motibu ku e ta konekta 2 parti importante di Kòrsou a bira un kaya hopi drùk. Habitantenan di e kaya varios bia tabatin kontakto ku Ministernan di Infrastrukura di turno. Tin hopi korespondensia entre e habitantenan i ministernan di turno, motibu pa kual den pasado Uitvoeringsorganisatie Openbare Werken, antes DOW, a hasi un investigashon pa determina kiko lo mester hasi pa krea un sistuashon mas sigur. Lamentablemente despues di e investigashon aki no a hasi nada pa drecha e situashon di e kaya i krea un ambiente sigur pa habitantenan. Nos di PIN mes a bai bishitá e habitantenan i tuma nota di e situashon ferfelu ku tin riba e kaya. 

 

Konklushon riba situashon di kaya Mikeas

Por konkluí lo siguiente:

1. E kaya na kuminsamentu ta basta largu i outonan ta kore bastante duru riba esaki, te na final di e kaya tin un krusada elevá i mas despues un retonde.
2. Tin hopi auto ta move riba e kaya i hopi bia ku velosidat haltu. 
3. Debi na e manera ku e bario ta hinká den otro, tambe e kantidat di auto ta okashoná molester di zonido.
4. E parti despues di e retonde, kual ta pasa dilanti di e flètnan di FKP, Kaya Hubert M. Scoop, tambe ta un kaya ku autonan ta kore hopi duru i bisiñanan eibanda ta splika kon auto a yega di dal den kurá di hende of bòltu bin dal den nan auto pará pafó.

 

Petishon na minister di Infrastruktura, sr. Ing. Charles Cooper

Nos no mester warda ora algu pio sosode pa nos tuma medida den e asuntu. Nos ke úrgi minister Cooper pa por fabor:

 

1. A) Enkargá Uitvoeringsorganisatie Openbare Werken pa revisá e situashon di e kaya aki ku úrgensia pa evitá desgrasia den tráfiko.
2. B) Tambe nos ta pidi laga pone mas drempel riba e kaya pa baha e velosidat di e vehíkulonan ku ta trafiká riba e kaya Mikeas.

 

Nos di PIN ta keda para tras di e habitantenan di kaya Mikeas i ta siguí vigilá e situashon   pa asina trese alivio pa habitantenan di e kaya.