Partido MAN ta solidario ku Pueblo di Ukraïna i ta kondená e invashon militar Ruso.

 

Partido MAN ta solidario ku Pueblo di Ukraïna i ta kondená e invashon militar Ruso.

Meskos ku henter mundu, partido MAN tambe a tuma nota di e invashon militar di
parti Rusia na Ukraïna, un pais soberano na e parti oriental di e kontinente Oropeo.
Gran mayoría di paisnan na mundu a desaprobá i asta kondená e akshon béliko
aki di parti Rusia, ku no tin hustifikashon.

Pueblo di Ukraïna a keda konfrontá ku un invashon militar di e ehérsito di Rusia,
kousando destrukshon, konsternashon i pániko bou di e poblashon den henter e país.
E situashon aki a provoká un huida masal di suidadanonan, ku di forma obligá mester skohe
pa bandoná nan país, den desesperashon pa salba nan bida i di nan famia.

E akshon militar Ruso na Ukraïna ta violá tratadonan internashonal ku ta protegá
integridat di pueblonan i outonomía di paisnan. Alabes e akshon ta kousando hopi sufrimentu
humano i tin konsekuensianan sosial i ekonómiko grave pa e pueblo di Ukraïna.

Partido MAN su fundeshi ta e ideología sosial-demókrata, ku ta basá riba prinsipionan
fundamental manera: Dignidat humano, Igualdat, Hustisia sosial, Libertat i Solidaridat.
Tur e prinsipionan aki ta relashoná ku derechonan humano básiko, soberanía di
di nashonnan i derecho di pueblonan, pa biba den un ambiente di pas i trankilidat.

Den kuadro di prinsipionan fundamental di partido MAN esta,
Solidaridat ku pueblonan di tur nashon, Dignidat humano ta sentral i Libertat,
partido MAN komo un partido sosial-demókrata ku tin 51 aña di eksistensia,
ta ekspresá siguiente posishon:

Partido MAN:
– ta kondená e invashon militar Ruso di forma enérgiko
– ta ekspresá solidaridat fuerte ku Pueblo di Ukraïna
– ta apelá na Pueblo di Rusia, pa éksigí un ko-eksistensia den pas ku nan pueblo bisiña
– ta hasi un yamada urgente na Gobièrnu di Rusia, pa para tur aktividat militar
na Ukraïna i retirá su trupanan for teritorio di Ukraïna
– ta pidi organisashonnan afiliá na “Sosial Internasional”, pa ekspresá Solidaridat
ku e Pueblo di Ukraïna.

Willemstad, 28 di febrüari 2022

 

Partido MAN

Drs. Yves “Payo” Schoop         Dr. Ivan “Steven” Martina        Roland Ignacio
Presidente                                Lider Polítiko                          Sekretrario General