TA MANTENÉ FIN DI YÜNI KOMO FECHA PA FINALISÁ NEGOSASHON PA DUNA KOMPANIANAN INTERESÁ DEN REFINERIA UN LUNA MAS PA ENTREGÁ NAN BINDING PROPOSALS

 

TA MANTENÉ FIN DI YÜNI KOMO FECHA PA FINALISÁ NEGOSASHON PA DUNA KOMPANIANAN INTERESÁ DEN REFINERIA UN LUNA MAS PA ENTREGÁ NAN BINDING PROPOSALS

Willemstad 3 di Mart 2022- Refineria di Kòrsou a hala e fecha pa entregá un proposishon final i fiho, esta un binding proposal, pa fin di Mart 2022.  RdK a hasi esaki riba petishon di algun di e kompanianan ku aktualmente ta hasi nan estudionan pa por entregá un proposishon pa manehá i operá e refineria. Durante e último luna akí ainda tin delegashonnan di e kompanianan interesá ta bishitando instalashonnan di nos refineria, pa asina tin un bista mas eksakto di e instalashonnan.  Di e forma aki nan por hasi un proposishon ku ta kuadra mas ku e realidat di e refineria na Emmastad i e terminal na Bullenbaai.  RdK, konforme e mandato di Gobièrnu di Kòrsou, direktamente despues lo por skohe e partido òf partidonan ku ta negoshá ku’né pa yega na un akuerdo ku un di e e kompanianan.  E meta ta pa no mas tardá ku medio di e aña aki yega na un akuerdo ku e kompania ku lo manehá i operá e instalashonnan petrolero di Kòrsou.

E interes di e kompanianan den nos instalashon petrolero ta notabel i ta brinda pèrspèktiva nobo na nos fasilidatnan petrolero.  Kòrsou ta bon aloká den e parti sur di Karibe kaminda ku banda di Venezuela a bin diskubrí petroli den suela na Guyana i Sürnam.  Banda di esaki, e echo ku hopi refineria a sera debí na e malestar den sektor petrolero den e añanan ku ta tras di lomba, ta hasi presensha di un refineria manera esun di nos interesante atrobe.  E tendensha na mundu ta tambe ku mientras konsumo di sierto produkto petrolero, manera por ehèmpel gasolin, lo por baha, e preis ta stabilisá i hasta ta subi, mientras konsumo di otro produktonan deriva di petrolio ta sigui oumentá segun demanda ta oumentá.  Pues tin motibu pa keda kere den un industria petrolero ku pèrspèktiva intersante pa Kòrsou.

RdK lo sigui informá segun e proseso ta kana i na su debido tempu kompartí nòmber di potenshal partner den operashon i maneho pa nos fasilidatnan petrolero.

This site uses Akismet to reduce spam. Learn how your comment data is processed.

%d bloggers like this: