Sentro di Detenshon i Korekshon Kòrsou Bishita di AMNESTY international .

Willemstad – Promé Minister Gilmar Pisas a risibí e organisashon internashonal ku ta sali na defensa pa derechi humano Amnesty dia 15 di mart 2022 na Fòrti.

Di parti di e organisashon di Amnesty tabata presente e direktora di Amnesty sekshon di Hulanda sra. Dagmar Oudshoorn i sra. Yara Boff Tonella.

Huntu ku Promé Minister tabata presente e ámtenarnan ku diariamente ta atendé ku e tema aki na Ministerio di Hustisia i algun konsehero.

Durante di e bishita a hiba un kombersashon fruktífero tokante e struktura i forma di traha di Amnesty. Tambe a para ketu na algun punto ku a keda formulá den e reportahe ku Amnesty a saka aña pasá tokante e situashon di indokumentadonan Venezolano aki na Kòrsou. Basa riba esaki a traha palabrashonnan konkreto kon ta bai traha ku otro den futuro pa mehorá e relashon entre Amnesty i Ministerio di Hustisia.

Pa loke ta trata e forma di hasi investigashon i traha reportahe Gobièrnu tabata tin algun pregunta al respekto i alabes a duna un splikashon riba e impakto negativo ku e reportahe aki tabatin pa nos pais. Den e kuadro aki a palabrá ku lo establesé un liña di kontakto mas direkto kaminda lo apuntá un persona di kontakto den Ministerio di Hustisia pa Amnesty. E organisashon por tuma kontakto ku e persona di kontakto aki pa asina haña informashon di parti di Gobièrnu. A palabrá tambe ku e koperashon lo bai ta mas transparente posibel.

Amnesty a keda informá ku for di aña 2019 tin un grupo di trabou mutuo, ku ta konsistí di ministerionan di Kòrsou i Hulanda i ku ta trahando huntu pa yega na un sentro di detenshon mas ekipá. Esaki tin di garantisá un mihó trato pa ku ekstranheronan indokumentá ku keda interseptá pa outoridatnan lokal.

A informá Amnesty tambe ku apesar di e situashon finansiero difísil ku nos pais ta aden, tòg e grupo di trabou a hasi progreso riba e área aki den e periodo ku a transkurí. Esaki talbes no ta sufisiente grandi, ni sufisiente rápido manera Pais Kòrsou i Amnesty lo a deseá, pero esaki ta debí na hopi sirkunstansianan manera Covid 19 i e situashon finansiero di pais.

Na momentu ku e sentro nobo pa indokumentadonan keda finalisá i bira operashonal lo bai mira un diferensia.

Despues di e bishita a duna Amnesty, riba nan petishon, e oportunidat pa bishitá tantu e parti kaminda e hende hòmber i hende muhénan indokumentá ta permanesé den e baraknan na SDKK. E representantenan di Amnesty a mira e desaroyonan rondó di e konstrukshon ku ta tumando lugá i a haña un splikashon amplio di esaki. Tambe e representantenan di e organisashon tabatin oportunidat pa hiba kombersashon ku tur dos grupo.

Gobièrnu di Kòrsou ta konsiente ku tin ku sigui traha pa yega na un situashon ideal i a pidi Amnesty espasio pa por sigui implementá nan rekomendashonnan.

A splika Amnesty ku kada deklarashon negativo lo tin konsekuensia grandi riba diferente área pa Kòrsou