Centrale Bank van Curaçao en Sint Maarten ta mantené e direkshon aktual di su maneho monetario

March 29, 2022 REDAKSHON

Centrale Bank van Curaçao en Sint Maarten ta mantené e direkshon aktual di su maneho monetario

WILLEMSTAD/PHILIPSBURG — Mirando e posishon sólido di divisa i kobertura di importashon den
e union monetario, Centrale Bank van Curaçao en Sint Maarten (CBCS) lo mantené e direkshon
aktual di su maneho monetario. No opstante, CBCS su Komité di Maneho Monetario (abreviá na
ingles komo MPC) lo sigui vigilá desaroyo ekonómiko den e union monetario djaserka,
spesialmente e indikadónan di mas importante pa polítika monetario, i lo adaptá e maneho
monetario si ta nesesario.
For di e di dos mitar di 2021, ekonomia di Kòrsou i di Sint Maarten a kuminsá duna señal di
rekuperashon, impulsá na promé lugá pa un rekuperashon vigoroso den aktividat turístiko.
Mirando e desaroyo akí, aktualmente CBCS ta proyektá un ekspanshon di PIB real di 6,1% pa Kòrsou
i 14,3% pa Sint Maarten na 2022. A ahustá e perspektiva ekonómiko pa 2022, adoptando
proyekshon ménos positivo pa tur dos pais kompará ku loke a publiká na desèmber di 2021, debí
ku inflashon ta surpasando e nivel proyektá i esei lo frena e desaroyo di entrada disponibel, loke
na su turno lo afektá konsumo privá. E nivel mas haltu di inflashon ta reflehá prinsipalmente e
oumento eksorbitante den preis di materia prima riba merkado internashonal i e trabanan den e
kadena di suministro ku probablemente lo persistí den transkurso di 2022.
‘No opstante, e union monetario tin un posishon di divisa sólido. For di fin di 2019, apesar di e
kontrakshon ekonómiko fuerte ku e pandemia di COVID-19 a trese kuné, reserva ofisial bruto (ku
eksepshon di e reserva di oro) a registrá un tendensia di oumento konstante’, segun presidente di
MPC, José Jardim. E tendensia akí ta debí prinsipalmente na (1) e sosten di likides risibí di Hulanda
den kuadro di e pandemia, (2) e transferensianan di World Bank den kuadro di rekonstrukshon di
Sint Maarten despues di Orkan Irma i (3) e fiansa ku gobièrnu di Kòrsou a risibí for di estado
hulandes pa finansiá e terminashon kontrolá di e operashonnan di Girobank N.V. Aktualmente, e
nivel di kobertura di impuesto ta na 7,1 luna; kómodamente mas haltu ku e norma di tres luna. E
nivel eksepshonalmente haltu akí di kobertura di importashon ta un refleho di e nivel haltu di
reserva ofisial bruto i e echo ku ainda importashon di produkto i servisio a keda bou di e nivel di
promé ku e krísis di COVID-19.
Mientrastantu, for di fin di 2019, e bankonan komersial a bin ta registrá un tendensia di oumento
den likides, sin ta duna niun señal di bahada riba término korto. No opstante, na 2021, e oumento
den krédito ekstendé na sektor privá tabata moderá, ku un promedio anual di 1,3%, i tabata
henteramente debí na e oumento den fiansa hipotekario.
En bista di esaki, CBCS a disidí di mantené e direkshon aktual di su maneho monetario. Esei ta
nifiká ku reserva obligatorio ta keda na 19,00%, beleningsrente na 1,0%, i MPC lo no purba di
apsorbé mas likides den e findishinan semanal di Sertifikado di Depósito (CD) entre e bankonan
komersial lokal.
No opstante, tin bastante faktor ku por afektá e perspektiva ekonómiko di e union monetario i
mayoria di nan ta faktor ku por tin un efekto negativo. Rusia su invashon resien di Ukrania por
empeorá e trabanan den e kadena di suministro i pone preis di materia prima, prinsipalmente di
krudo i produkto di grano, subi asta mas. Esei lo provoká mas inflashon na Kòrsou i Sint Maarten i
por afektá e kobertura di importashon tambe, ya ku importashon lo bira mas karu. Fuera di esei, e
bankonan komersial i invershonistanan institushonal por bira ménos inkliná pa invertí den
eksterior, debí na e nivel mas haltu di insertidumbre riba e merkadonan finansiero internashonal.
Algun otro faktor ku por tin un efekto negativo riba e perspektiva akí ta desaroyo di e pandemia,
segun ku mas variante sigui aparesé, i un konsolidashon fiskal riguroso ku no ta laga espasio pa
invershon di gobièrnu. ‘Mirando e nivel haltu di insertidumbre, MPC lo sigui vigilá e desaroyonan
djaserka i ahustá direkshon di e maneho monetario si ta nesesario’, asina Jardim a konkluí.
Willemstad, 29 di mart 2022
CENTRALE BANK VAN CURACAO EN SINT MAARTEN
***
E Komité di Maneho Monetario di CBCS ta deliberá a lo ménos kada kuartal riba e desaroyonan ekonómiko i
monetario di momento, i riba direkshon di maneho monetario. Komité di Maneho Monetario ta tuma
desishon tokante direkshon di maneho monetario i uso di e instrumentonan di maneho monetario, pa
despues Hunta di Maneho di CBCS ratifiká esakinan