Minister Pietersz- Janga a proklamá aña 2022 komo “Aña di Limpiesa”  

Minister Pietersz- Janga a proklamá aña 2022 komo “Aña di Limpiesa”  

Willemstad – Durante e espasio di rueda di prensa semanal di Gobièrnu di Kòrsou, Minister Pietersz- Janga a proklamá e aña aki komo “Aña di Limpiesa”. Lokual a kondusí na e akshon aki ta e echo ku kasi diariamente siudadanonan ta aserká Minister ku preokupashon relashoná ku e problemátika di sushi riba nos isla. Den e kuadro aki a forma un grupo di trabou multidisiplinario ku e meta pa atendé ku e problemátika aki for di diferente angulo.

E grupo di trabou ta konsistí di: Ministerionan di GMN, SOAW, VVRP i MEO, pero tambe SELIKOR, Stichting Curaçao Cleanup, Stichting Uniek Curaçao i CTB. Esakinan ta organisashonnan di diferente disiplina kual ta nifiká entre otro ku lo bini limpiesa, mas kontròl pero tambe programanan di konsientisashon. Konsientisashon di komunidat ta un tarea di nos tur i esaki ta kuminsá for di kas pero na skolnan tambe lo bini kampaña di informashon struktural. E responsabilidat pa tene Kòrsou limpi ta serka nos mes i ta nos deber pa mantené nos isla limpi i bunita.

Riba potrèt por mira momentu ku Minister Pietersz- Janga ta hasi entrega ofisial di e proklamashon na direktor di sektor di medio ambiente di GMN señor Gabriel Murray.

Tambe por mira potrèt di diferente landfill ilegal riba nos isla.