𝗠𝗶𝗻𝗶𝘀𝘁𝗲𝗿 𝗱𝗶 𝗛𝘂𝘀𝘁𝗶𝘀𝗶𝗮 𝘁𝗮 𝘀𝗲𝗿𝗮 𝗸𝗼𝗻𝗼𝘀í 𝗸𝘂 𝗞𝘂𝗲𝗿𝗽𝗼 𝗱𝗶 𝗕𝗿𝗮𝗻𝘁𝘄𝗲𝗿 𝗞ò𝗿𝘀𝗼𝘂

WILLEMSTAD – Djaluna 28 di mart 2022, Minister di Hustisia nobo, sr. Shalten Hato huntu ku kolaborador nan di Gabinete, Sekretario General i Direktor di Sektor di Hustisia a realisá un bishita pa sera konosí ku Brantwer Kòrsou. Di parti di e kuerpo, nan a keda risibí pa e Komandante di Brantwer Kòrsou, ing. Elvin Regina i su staf di manehó.

Durante di e reunion Minister di Hustisia huntu ku su delegadonan a risibí un presentashon di kon e kuerpo di Brantwer Kòrsou ta hinka den otro, funshonalidat i tareanan di kada departamento. Durante di e reunion tambe maneho di Brantwer Kòrsou a tene un presentashon relashoná ku e trayekto nobo den e kuerpo titulá “Versteviging van de Brandweer Curaçao”, durante kual trayekto lo atendé e siguiente areanan di atenshon:

1) Organisashon i funshon,

2) Areglo di posishon hurídiko,

3) Sistema di formashon profeshonal,

4) Lei i regla,

5) Plan di komunikashon interno i eksterno.

Durante di e reunion kuerpo di Brantwer Kòrsou a enfatisá riba e importansia pa kontinuá ku reunionnan struktural huntu ku e staf di manehó di Brantwer pa asina por garantisá e trabou nan di fortifikashon den e kuerpo i salbarguardiá posishon hurídiko di kada personal ku ta resortá bou di kuerpo di Brantwer Kòrsou.

Durante di e reunion a hasi entregá ofisial di plan pa e proyekto “Versteviging van de Brandweer Curaçao”, na Minister di Hustisia Shalten Hato.

Despues di reunion, Minister Hato a risibí un rekorido na pòst di Brantwer Rio Canario, Mundu Nobo, tambe na e kantor prinsipal di Brantwer Kòrsou. Riba petishon di Minister Hato, e la kombersa tambe ku personal di warda i skucha nan inkietut komo ambtenar i kon nan ta mira desaroyo di e kuerpo.

Despues di e enkuentro a palabra ku lo bai kontinuá ku tratamentu di e puntonan di atenshon pa Brantwer Kòrsou riba un base struktural.