Minister Rocco Tjon: A REUNI CU DIRECTIVA DI VEILIGHEIDSHUIS ARUBA Y A HAYA UN PRESENTACION AMPLIO DI E TRABOUNAN CU NAN TA HACI

Minister Rocco Tjon:

A REUNI CU DIRECTIVA DI VEILIGHEIDSHUIS ARUBA Y A HAYA UN PRESENTACION AMPLIO DI E TRABOUNAN CU NAN TA HACI

 

ORANJESTAD – Dialuna merdia, Minister di Husticia y Asuntonan Social Sr. Rocco Tjon a reuni cu directiva di Veiligheidshuis Aruba. Un reunion sumamente positivo caminda a ricibi un presentacion amplio di e trabounan cu nan ta haci, como tambe un bista riba kico ta e meta pa aña 2022.

 

Veiligheidshuis Aruba ta encarga cu entre otro e maneho di procesonan cu ta enfoka riba casonan compleho y personanan cu multi-problematica social. Tambe nan ta percura pa facilita y desaroya e colaboracion entre e cadena di cuido/social y e cadena hudicial.

Veiligheidshuis Aruba ta enfoka riba gruponan specifico, entre otro hobennan cu ta core riesgo, delincuentenan cu ta comete delito frecuentemente, personanan cu confusion, personanan cu problemanan di adiccion, psikiatrico y double diagnostico. Fuera di esey ta trata tambe cu agresornan y victimanan di violencia relacional, personanan indocumenta, y tambe adulto mayor.

 

Ta importante pa remarca cu Veligisheidshuis Aruba ta traha cu partnernan clave den e cadena hudicial y cuido social manera; Bureau Leerplicht, Bureau Sostenemi, KIA, Departamento di Asuntonan Social, Departamento di Voogdijraad, Fundacion Guia Mi, Wit Gele Kruis, Fundacion pa Maneho di Adiccion, Respaldo, Bureau Slachtofferhulp, Cuerpo Policial di Aruba, Ministerio Publico, Stichting Reclassering en Jeugdbescherming Aruba, Sociaal Psychiatrische Dienst y FCCA.

 

Por ultimo, durante e reunion aki a toca diferente punto di preocupacion, manera e aumento di uso di droga bou di hobennan y e lista di espera den cuido di salud mental. Pa e motibo aki e meta di Veiligheidshuis Aruba pa 2022 ta pa enfoka riba e cuido propio di e personal, desaroyo profesional, y deteccion trempan; estudio di casonan anterior den e cadena. Den cuadro di esaki, Ministerio di Husticia y Asuntonan Social a percura pa tin participacion structural den e reunionnan aki, mirando e balor agrega cu esaki tin pa henter e cadena, pa asina por coordina casonan mas miho y tuma e pasonan necesario pa por brinda e ayudo na tempo.

Share this page to Telegram

This site uses Akismet to reduce spam. Learn how your comment data is processed.

%d bloggers like this: