Minister Dangui Oduber Bishita na Wonden Poli ta demostra con importante prevencion y hiba un bida saludabel ta!

Minister Dangui Oduber

Bishita na Wonden Poli ta demostra con importante prevencion y hiba un bida saludabel ta!

ORANJESTAD – Diahuebs mainta riba Dia Mundial di Salud Minister di Salud Publico Sr. Dangui Oduber a bishita “Center For Advanced Wound Care” (CAWC)(ex Wonden Poli) na hospital caminda e la haya henter un rondleiding for di  Dr. Yuri Casseres acompaña pa e director Sr. Vroegop. E mandatario a keda hopi impresiona di e nivel halto di e calidad di cuido cu ta keda brinda na e aseguradonan na CAWC.

CAWC ta specialisa pa duna cuido na pashentnan cu tin heridanan cronico y complica, actualmente tin dos ubicacion esta na HOH y na ImSan. E nivel di cuido cu ta wordo brinda na CAWC ta di un nivel hopi halto cu e mihor materialnan riba mercado. E nivel di cuido di CAWC ta e mas halto den Caribe Hulandes, pa e motibo aki CAWC ta ricibi hopi pashent di entro otro Boneiro y Sint Maarten aportando di e manera aki na nos turismo medico.

CAWC ta trata alrededor di 400 pashent pa luna y ta duna consulta na mas o menos 1500 persona pa luna, pa aña ta duna alrededor di 17 mil consulta na HOH. Segun proyeccionnan haci pa HOH si sigui mescos pa aña 2024 e consultanan lo aumenta te cu 25 mil pa aña, asina e mandatario a trece dilanti.

Minister Oduber a trece dilanti cu gran parti di e pashentnan cu CAWC ta ricibi ta pashentnan cu ta surfi di e malesa di diabetes. E pashentnan aki ta wordo atendi diariamente pa cu nan heridanan. Pa e motibo aki e plan nacional di prevencion ta hopi importante mirando cu hopi di e pashentnan ta diabetico. Minister Oduber a expresa cu hopi di e pashentnan aki a perde nan dedenan of te asta nan pia, esaki ta baha e calidad di bida di pashent. Minister Oduber a sigui bisa cu e trabou cu Dr. Casseres y su team ta haci pa dirigi e centro aki no ta algo facil.

Minister Dangui Oduber anuncia tambe cu dia 22 di april lo bay lansa e “Aruba Healthy Lifestyle Center”. E centro aki lo bay enfoca riba personan cu ta sobre peso y cu ta cay den e grupo di risico pa haya malesanan NCD’s manera diabetes. Tur esaki ta den cuadro di e plan nacional di prevension segun e mandatario.

Minister Oduber y Gobierno ta keda enfoca riba e plan nacional di prevencion pa sigui conscientisa y informa e comunidad den hiba un bida mas saludabel. Ta mira con e gastonan di AZV ta sigui subi, e problemanan ta bira mas grandi y e desafio ta bira mas grandi pa hospital. Pa e motibo aki tabata tin un diferencia di opinion cu Hulanda den e cortamento di e 60 miyon den AZV. Minister Oduber a experencia un biaha mas con importante e ta pa sigui haci inversionnan den cuido, den caso di CAWC un recorte den cuido tin hopi efecto.

Finalmente Minister Dangui Oduber ta gradici Sr. Vroegop y Dr. Casseres pa e invitacion, alabes ta elogia Dr. Casseres y henter su team pa e tremendo trabou y servicio cu nan ta brinda nos aseguradonan.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: