Ministerio di Turismo y Salud Publico ta informa: Tocante e ley cu ta limita e uzo di poductonan di tabaco (Articulo 3)

 

Ministerio di Turismo y Salud Publico ta informa:

Tocante e ley cu ta limita e uzo di poductonan di tabaco (Articulo 3)

ORANJESTAD – Manera ya caba ta conoci, Aruba lo bay conoce e implementacion di “Landsverordening Beperking Tabaksproducten (AB 2016 no.41)”, e implementacion di e ley ta drenta na vigor dialuna 2 di mei 2022. E ley aki ta un ley cu a keda aproba unanimamente den Parlamento di Aruba di 26 di october 2021. E ley aki ta bay prohibi tur menornan di 21 aña pa cumpra, uza of pa traha den areanan cu ta bende productonan di tabaco.

Den cuadro di e plan nacional di prevencion Ministerio di Salud Publico conhuntamente cu Departamento di Salud Publico ta dedica na mehora e calidad bida, servicio y salud di Aruba su comunidad. E ley cu ta limita e uzo di poductonan di tabaco ta un di e aspectonan importante den Aruba su plan nacional di prevencion den salud. E ley ta importante, mirando cu uzo di sigaria ta dañino no solamente pa persona cu ta huma cual ta 13% di e populacion di Aruba riba 20 aña, pero tambe pa es(nan) cu ta den cercania.

Articulo 3: Doño di trabou ta responsabel pa proteha su empleadonan for di huma di sigaria den edificio of espacionan di trabou.

Den e articulo aki ta stipula cu tur doño di trabou lo mester adapta nan lugar di trabou na un manera cu nan empleadonan no ta bin den contacto directo cu e humanan di productonan di tabaco durante nan 8 ora di labor. Den otro palabra e area di huma no por ta e area caminda e empleadonan ta traha.  Tambe si acaso tin un area designa pa huma esaki mester tin un bon ventilacion.

E articulo aki tambe lo bay wordo controla pa Dienst Warenkeuring en Higiëne (DWH) y lo bay tin un multa pa incumplimento di ley aki. E articulo 3 ta pa proteha e trahadornan di e huma di productonan di tabaco na pia di trabou.

Den e articulo 3 lo tin algun excepcion, esaki ta pa por ehempel ora ta trata di salon (lounge) di ciga y/of hookah (waterpijp). Tin restaurantnan tambe cu tin e tipo di salonnan aki den nan. E tipo di establicimentonan aki lo mester pidi un excepcion (ontheffing) na Minister di Salud Publico. Despues di analisa e caso y segun consehonan e mandatario ta dicidi si e caso en particular ta haya e ontheffing si of no.

Ministerio di Salud Publico ta pidi empresarionan pa tene bon cuenta cu articulo 3 cu ta un articulo cu tey den e ley di tabaco pa proteha e clase trahador su salud na pia di trabou. Si tin algun pregunta y pa mas informacion yama of pasa libremente na Departamento di Salud Publico (DVG).

Share this page to Telegram

This site uses Akismet to reduce spam. Learn how your comment data is processed.

%d bloggers like this: