Mester revisá i konsientisá komunidat riba kontenido lei di tráfiko

 

Sekretario di Trabou Pa Kòrsou, Jonathan Symor

 

Mester revisá i konsientisá komunidat riba kontenido lei di tráfiko

 

Trabou pa Kòrsou TPK a tuma nota ku e kantidat di aksidentenan di último lunanan a subi, ta basta grave i/òf fatal. TPK kier a sa si e ministernan di VVRP, Hustisia i BPD tin un plan pa kontra-aresta esaki den korto tempu i hasi nos tráfiko sigur. TPK kier sa si minister di Hustisia a buska remplaso pa e hermèntnan di branwer ku a wòrdu hòrtá ya komo esakinan ta esensial pa reskatá hende den aksidente di tráfiko. Pero tambe kiko minister di Hustisia ta bai hasi pa enfoká kontrol di polis riba esnan ku ta pasa e máksimo di velosidat sigun lei di tráfiko.

 

Meskos TPK ke sa si minister di BPD ta bai introdusí un kurso obligatorio mara na renobashon di reibeweis pero tambe un kurso obligatorio tur aña pa esnan ku ta duna lès di tráfiko pa un persona risibí su reibeweis. TPK ke sa si e eksamen nan teorétiko i práktiko ta sigun e lei di tráfiko nobo òf si ainda e ta sigun e lei bieu.

 

TPK ta di opinion ku ta bon pa gobièrnu huntu ku otro instansianan kuminsa públika sifranan di aksidentenan semanalmente i e kousa di esaki despues ku outoridatnan kab’i hasi nan investigashon nan. Esaki alomenos lo por kuminsa hasi hende konsiente di e gravedat di e situashon di tráfiko. Nos lei di trafiko ta data for di aña 2000. Mientras tempu a pasa a bini hopi inovashon den e parti tékniko di tráfiko pero tambe den seguridat di trafiko. Parlamento i minister di VVRP a bishita ‘Intertraffic’ na Hulanda i a mira tur esakinan. Pues tin diferente manera pa influensha e komportashon di esnan ku ta partisipá den tráfiko den un direkshon positivo.

 

Tin un punto ku TPK semper a bini ta bisa, esaki ta ku mester bini bèk ku “wegenfondsbelasting”, pues di impuesto di kaya. TPK a splika esaki for di temporada di kampaña. E plaka ku pueblo ta paga pa plachi di number mester bai pa drecha infrastruktura bèk. Pero ta bon pa modernisá e lei na peso i tipo di vehíkulo. TPK a tuma nota ku e minister di di VVRP ta dispuesto di kana e trayekto aki i TPK ta sostené esaki.

 

E preguntanan ariba menshoná huntu ku e impuesto di kaya ta transformashonnan ku e gobernante orgániko kier implementá i asina trese seguridat den tráfiko.

Share this page to Telegram

This site uses Akismet to reduce spam. Learn how your comment data is processed.

%d bloggers like this: