Rines Martina, èkstra parlamentario orgániko Industrialisashon di agrikultura i krio di bestia tambe ta un pilá ekonómiko nobo Transformashon por pa medio di kooperativa i un banko agrario Kalidat i siguridat di kuminda a bira primordial riba mundu

Rines Martina, èkstra parlamentario orgániko

Industrialisashon di agrikultura i krio di bestia tambe ta un pilá ekonómiko nobo

Transformashon por pa medio di kooperativa i un banko agrario

Kalidat i siguridat di kuminda a bira primordial riba mundu

 

Trabou pa Kòrsou TPK   

a bin ta tuma nota ku e palabra ‘reforma’ a logra penetrá den komunidat. Pero pa TPK e palabra reforma a wòrdu venená dor di entre otro gobièrnu hulandes. Pesei TPK for di elekshon 2021 ta hasi uso di e palabra ‘TRANSFORMASHON’. Si Kòrsou hasi transformashon, hasiendo uso di E MODELO ORGÁNIKO kombertiendo agrikultura i krio di bestia den industria, esaki sigur lo krea un pilá ekonómiko nobo. Esaki ta krea kupo di trabou i duna hende oportunidat di tin un bida elevá.  

 

Naturalmente no ta pa loko hende ta bai planta tur kos i kria tur bestia. Kòrsou mester hasi esaki ta un manera planifiká. Mester definí kiko ta e kosnan ku ta bai planta i kua ta e bestianan ku ta bai kria.   Dikon esaki ta inportante? Paso e intenshon ta pa un dia Kòrsou yega asina leu ku nos ta kuminsa eksportá.  Na momentu di eksportá nos mester a planta e lokual tin nesesidat p’e na otro paisnan.  Por ehèmpel, mester skohe kua ta e 6 fruta i berduranan ku kier konsentrá riba dje. Meskos mester skohe kua bestianan nos ke konsentrá riba dje, galiña, porko, kabritu, TPK ta menshoná un par. Esaki no ta nifiká ku no por planta i kria otro nan. Naturalmente TPK ta apoyá tur sistema moderno pa planta manera ‘aquaponics’, èts., èts.

 

Kooperativa i banko agrario

Por logra e transformashon aki pa medio di e modelo kooperativa i un banko agrario. Kooperativa na un modelo ku a funshoná rònt mundu. Pues nos no mester inventá nada di nobo. Gobièrnu tin e deber di invertí den e pilá ekonómiko aki huntu ku sektor privá. Ku un banko agrario di gobièrnu tur ku ke drenta e industria aki por bini na remarke pa risibí fiansa na x porsentahe hopi abou. Pero no ta pa kosnan chikitu, nos ta papiando di industrialisashon. Magnitut grandi kreando kuponan di trabou, produkshon na kantidat grandi pa suministrá poblashon di Kòrsou i den futuro eksportá.

Siguridat i kalidat di kuminda

Mester kuminsa garantisá siguridat i kalidat di kuminda. Skarsedat di kuminda ta menasando mundu i mester aktua promé ku bira mas lat. Banda di esaki debí ku tin skarsedat di kuminda na mundu, e kalidat di kumindanan ku ta wòrdu importá tambe a kuminsa baha. Esaki tardi òf trempan ta bai tin efekto negativo riba nos fondo di SVB. 

Reto

Un di e retonan pa plantashon ku a sobra pa atende ta awa. Maneho di awa di suela na Kòrsou. Guia awa di awaseru manda dam I no laman. Pero awendia tin solushon pa esaki ku teknologia moderno kombertiendo e awa di laman den awa pa planta i pa medio di laboratorio drecha e PH di e awa. Pa e parti di krio di bestia mester prepará pa si dado kaso malesa presentá.

Mensahe pa kapitalistanan

Otro problema ta e sektor di kapitalista ku a bini ta bringa e sistema di kooperativa paso gobièrnunan di turno no a sa di mustra ku tin espasio pa tur hende traha sèn i drecha nan bida den e sektor aki. Debí ku gobièrnunan tradishonal semper a mantené e situashon unu kaminda nos mester keda importá i no a krese produkshon lokal, esaki a buta ku e kapitalista pa protehá su mes semper a bringa kontra kualkier otro kos ku nan ta konsiderá komo mensasa. Den e mundu di awendia nos mester kambia e mentalidat aki. Nos mester pensa kon huntu nos tur por krese mas. Pues e klase mas abou ta krese, e klase medio tambe ta krese mas i e kapitalista tambe ta krese mas. TPK tin un mensahe pa e sektor kapitalista. E mensahe ta ku TPK ta goberná pa tur gremio bai dilanti. Esei kiermen bosnan tambe. Si nos krese e industria aki, tur klase lo krese. 

Efekto positivo di e modelo orgániko

Ta momentu pa transformashon. Ta momentu pa wak e kosnan for di un otro punto di bista. Un transformashon di e forma aki lo sòru pa kuponan di trabou direkto, forsa di kumpra ta subi, mas entrada den kaha di gobièrnu, pues ekonomia ta drecha, produktonan lokal ta mas barata dimes, kalidat di kuminda garantisá. Tur gremio su bida ta elevá.