Pasa busca bo Boostershot DVG cu apelacion na tur 60 plus cu ta e grupo di risico

ARUBA- 30 di mei 2022. Mirando e cantidad di casonan di COVID positivo tur siman na Aruba. Departamento di Salud Publico (DVG) ta haci un yamado na e grupo di risico mas grandi cu ta ciudadanonan di 60 aña bay ariba pa pasa busca nan boostershot mas pronto cu ta posibel. E virus di COVID no a disparce, e tey y ta sigui transmiti su mes di un persona pa otro. 

 

Segun datos di DVG e grupo di risico mas grandi cu ta esnan di 60 aña bay ariba 90% a ricibi nan prome vacuna, 87% nan di dos vacuna, 54% e prome booster y unicamente 8% nan di dos booster. E porcentahenan bou di e grupo mas vulnerabel pa COVID sigur ta un precupacion pa DVG, mas ainda mirando e cantidad di casonan di COVID positivo tur siman. 

 

DVG kier recorda comunidad cu COVID tey presente y cu no ta pasobra bo persona a vacuna algun tempo atras nifica cu bo ta proteha pa bida largo, tampoco e no nifica cu bo persona no por haya COVID of cu bo no por bira hopi malo di esaki. Efectividad di e vacuna ta baha cu tempo pa cual motibo DVG ta haci e apelacion na e grupo di 60 aña y mas cu no a ricibi nan prome of di dos vacuna, of no a ricibi nan prome of di dos booster ainda pa pasa libremente sin mester di cita na edificio di DVG situa na Caya Ing. Roland Lacle # 4 na Oranjestad, unda tawata antes Lands Laboratorio na Playa. Nos ta habri for di 8or di mainta pa 12or di merdia y parti atardi for di 1or pa 4or pa tur persona por pasa busca nan vacuna y sigui ta proteha contra COVID-19. Pa por haya e prome of di dos booster e persona mester a ricibi su ultimo vacuna minimo 3 luna of mas pasa y un persona cu a haya COVID por haya su boostershot 3 luna of mas despues di a test positivo.

 

Pa mas informacion like nos Facebook page Directie Volksgezondheid DVG Aruba, subi nos website www.dvg.aw of yama nos na 5224200

 

 

This site uses Akismet to reduce spam. Learn how your comment data is processed.

%d bloggers like this: