google.com, pub-5639114718427035, DIRECT, f08c47fec0942fa0

PARLAMENTU TA RISIBÍ PRESENTASHON DI SKOL DI VOKASHON I SERTIFIKASHON DI CRU

Willemstad, 3 di Yüni 2022 – Refineria di Kòrsou (RdK) i Curaçao Refinery Utilities (CRU) a invitá miembronan di Parlamentu na e futuro ‘CRU Vocational School’ situá riba tereno di Refineria di Kòrsou. Propósito di e skol di vokashon ta pa desaroyá e profeshonalnan di fishi ku lo laborá na refineria pa medio di lès, training i guia, i na final ekipá nan ku un sertifikashon internashonalmente rekonosé. E presentashon a kuminsá ku un introdukshon marítimo kaminda a kompartí e histroria i desaroyo di refineria na Kòrsou i a finalisá na e skol di vokashon kaminda representantenan di RdK i CRU a duna presentashonnan na e parlamentarionan.

Djabièrnè mainta miembronan di Parlamentu di Kòrsou a bishitá e ‘Vocational School’ ku RdK i CRU lo lansa atrobe pa ekipá trahadónan di refineria den e fishinan nesesario pa refineria funshoná bon. Esaki,  riba invitashon di RdK i CRU. Despues di un introdukshon di historial di refineria for di e punto di bista marítimo, Direktor interino di RdK señor Patrick Newton, huntu ku Direktor di CRU señor David de Haseth, ofishalmente a risibí Parlamentu na e skol di vokashon di refineria.

Despues di e introdukshon, Manager di HR di CRU señor Benjamino Goeloe, a duna un splikashon tokante e situashon aktual pa loke ta trata trabounan di fishi i vokashonnan spesífiko ku lo tin mester na refineria na momentu ku ‘start up’ atrobe. Den un situashon ideal na Kòrsou lo por a tin un database ku informashon tokante tur habitante i nan profeshon, kaminda por haña un bista general di personanan di diferente fishi na Kòrsou mes ku por atraé pa funshonnan ku lo bira disponibel, pero tambe kuantu trahadó di fishi a bandoná nos isla. Dor ku esaki no ta disponibel, RdK i CRU ta lansa un plataforma di registrashon i organisá Dianan di Registrashon pa asina por hasi un 0-Meting di trahadónan di fishi ku ta disponibel i lo ke traha na nos refineria. Den esaki ta traha huntu ku entre otro ministerio di SOAW. Pronto lo kuminsá ku promoshon di e plataforma i e dianan di registrashon. Alabes CRU ta traha huntu ku SOAW pa un akreditashon rekonosé pa e sertifikadonan. Tambe tur kontratista ta obligá pa sigui training pa sigurá funshonamentu seif den tur aspekto na momentu ku laborá na refineria.

Finalmente Kordinadónan di Fishi di e skol di vokashon di CRU, señor Gershwin Mutueel, señor Aubert Wiels i señor Michael Doran a duna presentashon tokante e diferente nesesidatnan i e areanan di training i instrukshon ku lo ofresé na e ‘Vocational School’ na refineria. Despues di e registrashon di trahadónan di fishi tambe lo kuminsá promové e vokashonnan nesesario bou di hubentut, pa informá nan tokante e oportunidatnan pa desaroyo personal i karera den e mundu petrolero. Tambe lo promové trabounan nobo, tantu den e area operashonal di  refineria, komo tur otro trabou den diferente area manera atministrashon, poliklínika i hopi mas ku ta sòru pa bon funshonamentu di nos refineria.

 

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: