MAN KU UN DIREKTIVA NOBO DESPUES DI UN KONGRESO EKSITOSO

Kòrsou, 5 di Yüni 2022
WIILEMSTAD – Partido MAN (Movementu Alsa Nashon), djasabra 4 di yüni 2022 a tene su di 35 kongreso statutario. Segun statuto di e partido kada 2 aña mester tene un kongreso. Durante di e kongreso a trata diferente punto basiko di un kongreso i puntonan di aktualidat di interes general ku ta biba bòu di nos komunidat. Un di e aspektonan ku tabata ‘highlight’ durante di kongreso tabata elekshon di un direktiva nobo ku durante e próksimo 2 aña lo mester sigui duna kontinuidat na vishon i maneho di e partido. Di un forma demokrátiko a skohe e 10 miembronan di direktiva. E lider di partido konforme statutonan ta e di 11 miembro di direktiva. Sra. Irelnety Copra a keda eligí komo president di partido MAN, seguidamente sr. Eugene Cleopa komo vise-presidente, sr. Yaël Plet komo sekretario i sra. Florence Tomsjansen komo tesorero.
Banda di e funshonnan menshoná a eligí 6 miembro ku a postulá pa e funshonnan di komisario. E komisarionan elegí ta Eugene Valpoort, Curtley Perez, Anamarie Cijntje, Farley Lourens, Angel Alvarez i Jowenny Troeman. Na final di elekshon, e presidente saliente, sr. Yves Schoop, di un forma simbóliko a pasa e ‘martin’ di presidente pa sra. Copra. E presidente nobo seguidamente a hiba palabra na miembronan di Partido MAN i representantenan di prensa presente. Sra. Copra a indiká ku komo presidente nobo di Partido MAN e lo hasi su máksimo esfuerso pa dirigí e partido basá riba dignidat humano, inklushon, bon komunikashon, rèspèt mutuo i transparensia.
E HENDE lo ta e enfóke i ingrediente prinsipal di e direktiva nobo aki. Huntu ku su demas koleganan di direktiva i tur miembro di partido, sra. Copra lo traha pa logra bienestar general di nos komunidat. Direktiva sigur lo pone atenshon na temanan manera entre otro rekrutashon di miembro nobo, formashon di miembro i di e pueblo, kontakto ku pueblo, komunikashon ku tur nos “stakeholders”. Sra. Copra a finalisá su diskurso bisando,
“Pa mi ta un honor, pa a base di igualdat, kontribuí na desaroyo i bienestar di nos komunidat.”

This site uses Akismet to reduce spam. Learn how your comment data is processed.

%d bloggers like this: