google.com, pub-5639114718427035, DIRECT, f08c47fec0942fa0

POR PIDI PÈRMIT PA MARSHENAN DIA DI BANDERA I DIA DI KÒRSOU

MINISTERIO KONSERNÍ DESAROYO EKONÓMIKO

 PUBLIKÁ RIBA 06 YÜNI 2022

WILLEMSTAD- Konsiderando e éksito di e aktividatnan di Marshe ku a tuma lugá Dia di Rei último, Konseho di Minister a bai di akuerdo pa krea e posibilidat pa organisá un konsepto similar riba Dia di Bandera i Dia di Kòrsou (10 di òktober) tambe. Ku esaki lo bini
oportunidat pa organisá eventonan di marshe den tur bario di Kòrsou tantu riba Dia di Bandera komo Dia di Kòrsou. E inisiativa pa amplia organisashon di eventonan similar tabata un petishon di Ministerio di Desaroyo Ekonómiko (MEO), pa krea oportunidat pa esun ku a kustumbrá di lora man sali i ofresé su produkto òf servisio na mas hende i asina enrikesé nos sektor di ekonomia kreativo.

Kontrali na e manera ku tabata organisá aktividatnan asin’akí ántes, partisipantenan no mester pidi un pèrmit individual mas pa por para bende produkto riba e selebrashonnan spesífiko aki. Tur partisipante ku ke para bende den kualke área/bario durante un di e selebrashonnan akí, mester tuma kontakto direktamente ku e persona/organisashon na enkargo di e aktividatnan den e área/bario en kuestion. E persona/organisashon akí na su turno ta hasi petishon pa tantu un pèrmit di evento (evenementenvergunning) komo un pèrmit kolektivo di ‘standplaats’ i ‘vent’ pa e fechanan aki, den kua ta menshoná tur esnan ku lo bai hasi uso di e área pa bende nan produktonan sea via un stènt òf di forma ambulante. Tene kuenta ku ámbos pèrmit den e kaso akí ta di karakter temporal i ta konta solamente pa e evento ku ta tuma lugá riba e fecha spesífiko. Pa kada aktividat mester hasi un petishon nobo. E organisadó por kobra e partisipante un kontribushon chikitu pa yuda kubri entre otro gastunan di stènt i promoshon di e evento.

Preparashonnan pa diferente evento riba Dia di Bandera ya a kuminsá tuma lugá, tantu den sentro di siudat komo den e diferente bario rònt Kòrsou. Den sentro di siudat ta bai tin evento organisá pa Ministerio di Enseñansa, Siensia, Kultura i Deporte (OWCS). Si akaso bo ta un persona interesá pa bende kos riba e dia akí durante kualke evento ku tin, por fabor tuma kontakto mas pronto posibel ku e organisadó di evento den e bario/área kaminda bo ta deseá di bende kos. Tur organisadó tin te ku djaluna, 13 di yüni 2022 pa entrega petishon pa pèrmitnan di tantu ‘standplaats’ komo ‘vènt’ na Lokèt di Pèrmit. Pa mas informashon tokante dokumentonan nesesario, tarifanan i informashon general tokante e pèrmitnan temporal di ‘standplaats’ i ‘vènt’, por tuma kontakto libremente ku Lokèt di Pèrmit na number di telefòn 434-1690 òf por manda un mail na intake.vergunningenloket@gobiernu.cw.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: