Minister di Finansa ta keda ku atenshon pa Duana.

WILLEMSTAD- Riba djárason 8 di yüni minister di Finansa Javier Silvania a bishitá Duana di Kòrsou. Pa algun aña kaba Duana ta pidi atenshon di gobièrnu pa e desafionan ku nan ta haña nan konfrontá kuné diariamente. Ta papia aki di entre otro, falta di personal, edifisionan ku ta defisiente, falta di espasio i materialnan pa por traha di un forma efisiente. Pa por keda avansá riba tereno personal i profeshonal ta importante pa duaneronan por sigui desaroyá nan mes pa medio di estudio i kurso. Pa hasi esaki, digitalisashon ta un punto importante. Un trayekto ku meskos ku pa Belastingdienst, minister Silvania ke realisá pa Duana tambe.
Apesar di situashon prekario ku Duana ta aden, tur dia dinobo e tim di Duana ta hasi lo máksimo pa ehersé nan trabounan manera debe ser. Duana tin tareanan fiskal i no-fiskal pa kumpli kuné manera kontrol, stipulashon di pago i kobransa i investigashon di e diferente derechonan di importashon. Banda di esaki Duana ta supervisá sierto leinan i hasi diferente investigashon ku ta kontribuí efektivamente na nos desaroyo ekonómiko, seguridat di Pais, medio ambiente i salubridat públiko di Kòrsou.
E entusiasmo ku e duaneronan a risibí minister Silvania durante e rekorido, tabata kontagioso. Durante e rekorido minister Silvania a tuma su tempu pa bishitá e diferente departamentonan i a sera konosí personalmente ku e duaneronan, ku visiblemente ta hasi nan trabou ku hopi dedikashon. Ku promesa pa duna oido na e preokupashonnan di Duana, minister Silvania a terminá e rekorido bisando ku su esfuerso pa kumpli ta garantisá i su kurason ta i lo keda bati pa Kòrsou.

HATO

 

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: