Minister di Hustisia mr. Shalten Hato ta hasi yamada na hóbennan pa e proyekto “Un Komienso Nobo”.

Minister di Hustisia mr. Shalten Hato ta hasi yamada na hóbennan pa e proyekto “Un Komienso Nobo”.
Kòrsou, 20 yüni 2022. Mester duna hóbennan un di dos oportunidat den bida.
WILLEMSTAD – Minister di Hustisia Shalten Hato ta kere ku hóbennan ku pa kualkier motibu no a logra terminá nan estudio i no por haña trabou, meresé un di dos oportunidat. P’e motibu aki mes komo partner Minister Hato ta kere den e proyekto interministerial “Un Komienso Nobo”. Hóbennan ku pa un òf otro motibu tabata den kontakto ku hustisia tambe lo por forma parti dje proyekto aki. Minister Hato den kuadro dje proyekto aki ta hasi un yamada na hóbennan tantu hòmber komo muhé entre 18 pa 24 aña pa inskribí i forma parti dje proyekto aki i asina duna inisio na un fase nobo den nan bida.
PROME FASE
E hóbennan ku inskribí mester pasa dos dia di tèst pa determiná si nan por pasa e parti físiko di e asina yama “Sociaal Vormings Traject” (SVT). Esaki ta tuma lugá na Kazèrne di Marina Suffisant bou di guia di Defensa. Durante un periodo di 4 luna e hóbennan ta siña den un forma militar norma i balornan manera disiplina, rèspèt propio, struktura, resistensia, konfiansa i sentido di responsabilidat.
DI DOS FASE
Despues di e promé fase e hóbennan ta drenta e di dos fase di e proyekto ku ta konsistí di un trayekto di aprendisahe asina yama Leerwerktraject (LWT), bou di guia di e organisashon ehekutivo Funditut. Durante e fase aki e hóbennan ta kontinuá ku un preparashon pa un trabou ku ta kuadra ku nan kapasidatnan pa despues nan por haña un trabou. Ku e proyekto akí Gobièrnu di Kòrsou huntu ku Defensa ta brinda perspektiva o sea un komienso nobo na e grupo di hóbennan aki.
Dia 22 di ougùstùs un trayekto nobo di SVT ta kuminsá. Ainda tin espasio pa algun hóben ku ta interesá. Bo tin entre 18 i 24 aña, bo no a kaba bo skol i bo no tin un trabou òf bo a yega di bin den kontakto ku hustisia, apliká dor di manda un mensahe na unkomiensonobo2022@gmail.com òf via WhatsApp na +5999 526 7369. E tim lo duna bo tur informashon i lo guia bo kon pa inskribí. Aplikashon pa e trayekto ku ta kuminsá 22 di ougùstùs ta sera 30 di yüni 2022. Tambe mayor o un familiar por drenta den kontakto ku e tim pa risibí informashon di e proyekto.

This site uses Akismet to reduce spam. Learn how your comment data is processed.

%d bloggers like this: