Segun PIN koalishon ta hasi wega ku alivio. Gobièrnu ta drai riba ‘di tili si, ma di tala no’.

 

 

Willemstad — E zeilumentu di gobièrnu Pisas ta sigui ora ta trata alivio pa pueblo. Den un moveshon di ‘wise guy’, pa sirbidónan públiko a kambia plaka di vakashon’ pa ‘gratifikashon’. Sinembargo p’e gratifikashon tampoko no tin konseho di CFT, siendo ku esei ta nesesario paso ainda Kòrsou tin un buraku riba su presupuesto. Ademas Partido PIN ta puntra: kon bin gobiernu ta dispuesto pa pasa dor di kandela ku Hulanda pa paga gratifikashon i eliminá e 12,5%, pero e mes gobièrnu ei no por presentá niun plan di alivio na drechi dirigí riba esnan mas vulnerabel? PIN a yega n’e konklushon ku gobièrnu ta hungando un simpel wega di imahen polítiko k’e asuntu di alivio pa pueblo.

 

Klaridat

Durante di e krísis ku ainda pais ta aden Partido PIN a keda mustra riba e nesesidat di balansa. Hopi biaha PIN a sugerí pa yama un Kumbre Nashonal  ku e meta pa yega na desishonnan konkreto den forma di un Pakto Nashonal. Sinembargo minister presidente i su tim ta keda skohe pa hunga wega di gai bibu, buskando un tersera pa kulpa pa su inkapasidat i falta di boluntat pa duna pueblo loke e mesté. E zeilumentu ta hopi bisto den e asuntu di plaka di vakashon, gratifikashon i e 12,5%.

 

Pa klaridat i pa komunidat sa sigur ku e no ta opheto di manipulashon, Partido PIN ta pidi gobièrnu Pisas kontestá e siguiente preguntanan:

  • Kua kondishon ku Hulanda a pone pa eliminá e 12,5% Gobièrnu Pisas no ta di akuerdo kune?
  • Ki ruta gobièrnu a fiha pa su mes pa por bai bek n’e situashon pre-pandemia? Akaso eliminashon inkondishonal dje 12,5% ta simplemente un triki pa no mesté atende k’e entradanan haltu?
  • Dikon gobièrnu no a kompañá e intenshon pa gratifiká sirbidónan públiko, ku alivio konkreto dirigí riba e gruponan mas vulnerabel den nos komunidat òf gobièrnu ta haña ku esnan mas suak mes mester wak kon nan ta hasi?
  • Gobièrnu no ta kere ku ora e aliviá e sirbidó públiko so, innesesariamente e ta hink’e den barika di esnan hopi mas vulnerabel den nos pais, resultando den diskushon kompletamente kontra produktivo entre nos-ku-nos?
  • Kon bin gobièrnu, korektamente ta drenta den akshon relámpago pa tene nos kuerpo di sirbidó públiko motivá, pero ta siegu, muda i surdu ora ta trata aplikashon dje redukshon di impuesto OZB?  E ‘di tili si, ma di tala no’ aki ta un manera pa pai sindikatonan?
  • Ora gobièrnu ta broma ku ehekushon di Landspakket ta kana sublime, e ta kòrda ku eiden ainda tin skibí ku, den forma di redukshon di ‘duurtetoeslag’, lo bai kòrta den penshunnan si? Ki dia lo anunsiá k’e medida ei kontra e penshonado indefenso ta fo’i mesa?

 

Partido PIN i komunidat ta keda pendiente di kontesta i klaridat.

 

This site uses Akismet to reduce spam. Learn how your comment data is processed.

%d bloggers like this: