𝐀𝐤𝐬𝐡𝐨𝐧 𝐝𝐢 𝐥𝐢𝐦𝐩𝐢𝐞𝐬𝐚 𝐠𝐫𝐚𝐧𝐝𝐢 𝐧𝐚 𝐊𝐥𝐞𝐢𝐧 𝐊𝐨̀𝐫𝐬𝐨𝐮 𝐝𝐞𝐧 𝐟𝐢𝐧 𝐝𝐢 𝐬𝐢𝐦𝐚𝐧.

Djasabra último mas ku 100 boluntario bou di Curaçao Clean Up a bolbe bai Klein Kòrsou pa hasi un limpiesa grandi. E biaha aki no a konsentrá riba e shushedat ku laman ta spula trese kantu pero a bai pa limpia e mini lèntfel ku a sobra patras dje kasnan di piskadó i p’esei ekspertonan di asbèst tambe a forma parti dje tim pa yuda deshasí dje plachinan bentá abou. Riba e mini lèntfel a konstatá ku tin basta djaka ta biba, ku ta kome webunan di para i probablemente di turtuga.

Mester tene kuenta ku Klein Kòrsou ta kai bou di un “Ramsargebied”. Esei ta un aria ku un pais tin e deber di konservá e naturalesa. Klein Kòrsou ta un sitio kaminda turtuga bèrdè, “endangered species” (animalnan ku ta desaparesiendo) ta bin pone webu . Banda di esei tin hopi sorto di para di laman, den nan tambe diferente “endangered species”, ku ta bin pone nan webunan na Klein Kòrsou.

Curaçao Clean Up huntu ku tur otro organisashon ku ta yuda, ta mira e nesesidat urgente pa kuida e pida baranka aki ku tin un balor imenso pa nos naturalesa.

E akshon di limpiesa aki a eksihí un preprarashon adelantá imenso ya ku ta basta trabou mester a desplegá riba e isla ku e ekspertonanan di e diferente kompania i instansianan.

Nos minister di Salú Públiko i Medioambiente, sra. D. Janga , kompañá pa sr. G. Murray, “sector directeur”, tambe a bai Klein Kòrsou pa pone nan mes na altura dje situashon na e isla.

Ta di tres biaha ku Curaçao Clean Up ta hasi un limpiesa grandi asina (2016 i 2018). Boluntarionan di Seaturtle Conservation ta mantené e limpiesa tur siman

durante nan bishita na Klein Kòrsou pa monitoriá e turtuganan.

Esaki ta demostrá ku si hasi esfuerso kontinuo POR logra mantené un sitio limpi .

E aktividat di limpiesa aki tabata posibel Danki na Selikor NV ku semper ta kla pa duna un man, tambe Mermaid Boat Trips Curacao Miss Ann Boat trips Curacao, Kwisolutions B.V., DeliNova, Firgos Curacao, Coca-Cola Curacao, Sea Turtle Conservation Curacao i Curacao Industrial Divers

Un DANKI grandi ta bai na tur e boluntarionan ku sigur a hasi un gran trabou. Tabatin mester di hopi boluntario pa por a transportá diferente material pisá di e isla ku boto chikí pa hinka den konteiner riba ‘White Tip ’, ku ta e boto grandi ku a transportá tur sushi.

Ta publiká e kantidat di kilo di shushi despues di Selikor pisa esaki, den transkurso di siman, riba nos medionan sosial.

Curaçao Clean Up ta hopi kontentu ku e koperashon, akshon, dedikashon i konsientisashon di un i tur ku sigur ta kontribuí pa keda tene nos Klein Kòrsou tambe limpi.