Ministerio di Finansa ta presenta un programa informativo tocante e Resultado Excelente di CFATF – Un logro sumamente importante pa Pais Aruba
Recientemente Pais Auba a score un resultado excelente den e evaluacion di Caribbean Financial Action Task Force. Pais Aruba y Bermuda a sali e dos Paisnan cu e miho sistema financiero den Caribe.
Minister Xiomara ta informa cu esaki ta un logro sumamente importante pa Aruba. Ya cu e resultado aki ta demostra cu Aruba ta cumpli cu e recomendacionnan pa preveni y combati labamento di placa y financiamento di terorismo.
E resultado excelente aki ta manda un señal fuerte na inversionistanan cu nan inversion na Aruba ta sigura y cu institutonan financiero ta digno pa sigui conta cu e servicio di corespondencia bancario cu ta facilita transaccionnan internacional na Aruba.
Durante e programa informativo aki, expertonan di dos instancia cu ta resorta bou di Ministerio di Finansa ta brinda un splicacion riba e topico aki. Sr. Angelo Brete, director di Financial Intelligence Unit (FIU) Aruba y sr. Prakash Mungra, Executive Director Supervision & Enforcement di Banco Central Aruba ta elabora riba e trabounan cu a wordo haci y ta splica e importancia di e resultado positivo di e rapport di CFATF pa Pais Aruba.
E programa informativo aki ta wordo pasa dialuna, dia 1 di augustus pa 7’or di anochi na TeleAruba y diamars dia 2 di augustus, pa 8’or di anochi na Diario TV.
Minister di Finansa ta extende un invitacion na pueblo henter pa sintonisa e programa ‘E Resultado Excelente di CFATF’ pa asina ta bon informa tocante e balor di e resultado positivo aki pa Pais Aruba.
